सिरोंचा महामार्गावरची घसरण – जबाबदारीच्या वाटेवरचं मौन

सिरोचा विशेष प्रतिनिधी दिनांक 17 मे 2023                               आलापल्ली ते सिरोंचा दरम्यानचा राष्ट्रीय महामार्ग क्रमांक 353 – नावानं राष्ट्रीय असला, तरी प्रत्यक्षात हा मार्ग सध्या एक राष्ट्रीय वेदना बनलेला आहे. या मार्गावरुन प्रवास करणं म्हणजे एखाद्या अजाण थरारक खेळात उतरल्यासारखं आहे – कधीही, कुठेही काय होईल याचा नेम नाही.

गेल्या दोन वर्षांपासून हे काम सुरू आहे, पण गती शून्य आणि गुणवत्ता संदेहास्पद. अधेमधे काही मशीन्स दिसतात, एखादं रोलर फिरतं, पण खड्डे, मुरुम आणि उखडलेल्या रस्त्यांचे थर जनतेच्या सहनशीलतेला गिळत चालले आहेत.

सणासुदीची वेळ, आणि मृत्यूसमान धडकी

१६ मे रोजी सकाळी, आलापल्लीहून वऱ्हाड घेऊन निघालेल्या एका वाहनाने निमलगुडम गावाजवळ आपलं नियंत्रण गमावून रस्त्याच्या कडेला झाडावर आदळलं. लग्नाच्या वऱ्हाडातलं हे वाहन जणू उत्सवाच्या ओळींमध्ये आलेला विराम होता.

या वाहनात नवरदेवाचे वडील, बहीण, मामा आणि भाची होते. त्यांच्या आनंदातले स्वर क्षणातच शरिराच्या वेदनेत हरवले. आलापल्लीतील खासगी रुग्णालयात उपचार सुरु झाले, तर चालकाला पुढील उपचारासाठी चंद्रपूरला हलवावे लागले.

अर्धवट रस्ते, संपूर्ण धोका

  या मार्गावरील नाले, अर्धवट ब्रिजेस, सैल गिट्टी, निकृष्ट दर्जाचे मुरुम आणि खचलेला पृष्ठभाग – या सगळ्याचं एकत्रित रूप म्हणजे हा महामार्ग. पहिलाच पाऊस झाला की, रस्ता वाहतो, आणि त्याचं प्रमाणपत्र जणू अपघातात मिळालेल्या जखमा असतात.

या अपघातानंतर स्थानिकांनी पुन्हा प्रश्न विचारायला सुरुवात केली – “अखेर आमचं रक्त सांडल्याशिवाय प्रशासन हलणार नाही का?”

जवाबदारी कुणाची?

कंत्राटदारांनी घेतलेला बेजबाबदारपणा, प्रशासनाचं मौन, लोकप्रतिनिधींचं निष्क्रियतेकडे झुकलेलं वर्तन – या सगळ्याचं उत्तर जनतेला रुग्णवाहिकेतून किंवा भिजलेल्या रस्त्याच्या कडेला झुरत देणं योग्य ठरतं का?

या महामार्गावर झालेल्या भ्रष्टाचाराच्या चौकशीसाठी सामाजिक कार्यकर्ते, स्थानिक नागरिक वारंवार निवेदने देत आहेत. परंतु ती निवेदने कागदांवरच राहून रस्त्यावरील खड्ड्यांमध्ये हरवत चालली आहेत.

पावसाळा फक्त निसर्गाचा नाही, व्यवस्थेचाही असतो

आता अवकाळी पावसाने रस्त्यांची अवस्था आणखी बिकट केली आहे. मुरुम वाहून जातोय, पाणी खड्ड्यांमध्ये साठतंय, आणि या पाण्यात अडकलेली आहे जनतेची सुरक्षितता.

या पावसाळ्यात पुन्हा एकदा सिरोंचा ते आलापल्ली मार्ग पूर्णपणे बंद पडण्याची शक्यता आहे. नागरिकांना वैद्यकीय उपचार, दैनंदिन व्यवहार आणि शासकीय कामांसाठी तेलंगणामार्गे वळसा घालावा लागणार आहे.

• स्वप्नांच्या रस्त्यावर प्रशासनाचं डोळेझाक

एका लग्नाचं स्वप्न जेव्हा अशा धक्क्याने उद्ध्वस्त होतं, तेव्हा तो केवळ वैयक्तिक प्रसंग राहत नाही. तो संपूर्ण व्यवस्थेच्या कार्यपद्धतीवर भक्कम प्रश्न उभा करतो.

      हा अपघात नसून, ही संघटित निष्काळजीपणाची झलक आहे. आणि म्हणूनच यावर केवळ चौकशी पुरेशी नाही, तर दोषींवर कठोर कारवाई, ठेकेदारांची जबाबदारी आणि महामार्गाच्या कामात पूर्ण पारदर्शकता हवीच.

—