कालेश्वर तेलंगणा विशेष प्रतिनिधी दिनांक:-21/05/2025 – कालेश्वर महाकुंभाच्या पार्श्वभूमीवर त्रिवेणी संगम स्थळी उभारण्यात आलेली १७ फूट उंचीची सरस्वती देवीची मूर्ती, भव्य महाकाल मूर्ती, तसेच तेजस्वी आत्मज्योती स्तंभ या तिन्ही प्रतिकात्मक निर्मिती भाविकांसाठी विशेष आकर्षण ठरत आहेत. श्रद्धा आणि सौंदर्याचा हा अद्वितीय संगम पाहण्यासाठी स्थानिकांसह दूरदूरून भाविक मोठ्या संख्येने येथे येत आहेत.
सुसज्ज रचना, कलात्मक प्रकाशयोजना, आणि धार्मिक वातावरण यामुळे हे संपूर्ण स्थळ एक अलौकिक तेजाने उजळून निघाले आहे. सरस्वती देवीची १७ फूट उंच भव्य मूर्ती ज्ञान आणि शांतीचे प्रतीक म्हणून उभी राहिली आहे, तर महाकाल मूर्तीच्या रौद्रतेतून शक्ती आणि संरक्षणाचा संदेश मिळतो. आत्मज्योती दीपस्तंभ ही श्रद्धेची अखंड ज्योत असल्याची भावना भक्तांच्या मनात जागृत होते.
हे दृश्य इतके भव्य आणि मनमोहक आहे की, येथे येणारे अनेक भाविक या तीनही प्रतीकांपाशी सेल्फी घेत असून, त्या आपल्या सोशल मीडियावर स्टेटस स्वरूपात शेअर करत आहेत. श्रद्धेचे हे डिजिटल दर्शन समाजमाध्यमांवरून झपाट्याने पसरत आहे.
हे धार्मिक आणि सांस्कृतिक स्थळ केवळ दर्शनासाठी नाही, तर मनाला शांती आणि प्रेरणा देणारे ठिकाण म्हणूनही ओळखले जाऊ लागले आहे. श्रद्धा आणि सौंदर्य यांचा हा अनोखा संगम आजच्या पिढीलाही आकर्षित करत असून, मोबाईलमधील फोटोद्वारे ती भावना अनेकांच्या मनात पोहोचते आहे.
स्थानिक नागरिक आणि आयोजकांनी हे स्थळ सुशोभित ठेवण्यासाठी विशेष प्रयत्न केले असून, भाविकांना सुखद अनुभव मिळावा यासाठी योग्य व्यवस्था करण्यात आली आहे.
Users Today : 57
Total Users : 58748931
Views Today : 64
Total views : 58767080
Who's Online : 2
Your IP Address : 216.73.216.179