सामूहिक योग साधनेतून आरोग्याचा जागर – सिरोंचातील ऐतिहासिक उपक्रम….

सिरोंचा तालुका प्रतिनिधी दिनांक:-21/06/2025                            २१ जून २०२५ रोजी आंतरराष्ट्रीय योग दिन निमित्ताने सिरोंचा तालुक्यातील जिल्हा परिषद हायस्कूलच्या मैदानावर भव्य योग कार्यक्रमाचे आयोजन करण्यात आले. महसूल विभाग व पंचायत विभागाच्या संयुक्त विद्यमाने आयोजित या कार्यक्रमाने तालुक्याच्या आरोग्यदृष्टिकोनातून ऐतिहासिक पाऊल उचलले.

सकाळी ६ वाजता सुरू झालेल्या या कार्यक्रमात अनेक नागरिक, शासकीय कर्मचारी, विविध सामाजिक आणि सांस्कृतिक संघटनांचे कार्यकर्ते तसेच विद्यार्थी, महिलावर्ग आणि जेष्ठ नागरिकांनी उपस्थित राहून उत्स्फूर्त सहभाग नोंदवला.

या भव्य कार्यक्रमाचे मुख्य आकर्षण ठरले एक तासाचे सखोल योग प्रशिक्षण सत्र. या सत्राचे नेतृत्व पतंजली योगपीठ संस्थेचे योग मास्टर श्री. सोमनपल्लीवार व श्री श्री रविशंकर यांच्या संस्थेचे समीर अरगेलवार यांनी केले.
त्यांनी श्वासावर नियंत्रण, मानसिक स्थैर्य, शरीराची लवचिकता आणि रोगप्रतिकारक शक्ती वाढवण्याचे विविध उपाय सांगत विविध योगासने, प्राणायाम व ध्यानसाधनेचे प्रात्यक्षिकातून सादरीकरण केले.योग ही भारताची मौल्यवान देणगी असून तिचे आधुनिक जीवनशैलीत महत्त्व अधिकच वाढले आहे, हे त्यांनी उपस्थितांसमोर सप्रमाण मांडले.

कार्यक्रमास सिरोंचा तालुक्याचे तहसीलदार श्री. निलेश होनमोरे यांनी विशेष उपस्थिती लाभवली.आपल्या भाषणात त्यांनी योग दिनाच्या आयोजनाचे कौतुक करताना सांगितले की, “योग ही केवळ शारीरिक क्रिया नसून जीवन जगण्याची संपूर्ण पद्धती आहे. निरोगी शरीर, सकारात्मक मन आणि एकाग्रता साधण्याचा सर्वोत्कृष्ट मार्ग म्हणजे योग. प्रत्येक नागरिकाने रोजच्या दिनचर्येत योगाचा समावेश करावा, यामुळे समाज आरोग्यसंपन्न बनेल.”
त्यांनी “रोज योग करा आणि निरोगी राहा,” असा प्रबोधनपर संदेश दिला.

संघटनांचा व्यापक सहभाग आणि उत्स्फूर्त प्रतिसाद

या कार्यक्रमात विविध सामाजिक, धार्मिक आणि सांस्कृतिक संघटनांनी सामूहिक सहभाग नोंदवत योगप्रेमाची प्रचीती दिली.त्यामध्ये विशेषतः पतंजली योगपीठ, राष्ट्रीय स्वयंसेवक संघ (RSS), भारतीय जनता पार्टी, बजरंग दल, विश्व हिंदू परिषद, श्री श्री रविशंकर यांचे भक्तगण, तसेच तालुक्यातील सर्व शासकीय व निमशासकीय कर्मचारी वर्ग, महिला मंडळे, शिक्षकवृंद व स्वयंसेवी संस्था यांचा उल्लेखनीय सहभाग होता.

    भारतीय जनता पार्टी सिरोंचा तालुकाध्यक्ष श्री. श्रीनाथ राऊत यांच्या पुढाकाराने व समन्वयाने संपूर्ण कार्यक्रम शिस्तबद्ध पद्धतीने पार पडला.योग सत्रानंतर त्यांनी संवाद साधत सांगितले की, “भारतीय परंपरेचे जतन आणि आरोग्य संवर्धनाच्या दृष्टीने योग दिन हा अत्यंत आवश्यक उपक्रम आहे. येत्या काळात तालुक्यातील प्रत्येक गावात अशा कार्यक्रमांची गरज आहे.”

उत्साह, समरसता आणि जागरूकतेचे दर्शन

कार्यक्रमादरम्यान संपूर्ण परिसर योगमय झालेला होता. रंगीत योगमॅट्सवर बसलेले विविध वयोगटातील योगाभ्यासी, हात जोडून प्रार्थना करताना दिसणारी महिला मंडळे, कुतूहलाने आसने आत्मसात करणारे विद्यार्थी आणि श्वासावर नियंत्रण ठेवणारे वृद्ध – या सर्वांनी सामाजिक ऐक्य, आरोग्यवर्धन आणि सांस्कृतिक मूल्यांची जपणूक यांचे दर्शन घडवले.

सिरोंच्यात पार पडलेला हा योग दिनाचा कार्यक्रम हा केवळ औपचारिकता नसून, निरोगी जीवनाकडे वाटचाल करणारा एक व्यापक उपक्रम ठरला.योग म्हणजे फक्त शरीराची हालचाल नव्हे, तर आत्मिक शांती, मनोबल वाढवणे आणि भारतीय संस्कृतीशी जुळलेली एक अमूल्य देणगी आहे, याचे भान या कार्यक्रमामुळे प्रत्येक उपस्थिताच्या मनावर बिंबले. असा निष्कर्ष निघतो