सिरोंचा नगरपंचायत नगराध्यक्ष पदाचे आरक्षण जाहीर

सिरोंचा विशेष वृत्त विदर्भ न्यू्स 24 नेटवर्क दिनांक:-06/10/2025

महाराष्ट्रभरातील नगरपंचायतींच्या नगराध्यक्ष पदासाठी आरक्षण सोडत जाहीर होताच सिरोंचा तालुक्यात राजकीय हालचालींना वेग आला आहे. नुकत्याच जाहीर झालेल्या आरक्षणानुसार सिरोंचा नगरपंचायत अध्यक्षपद हे अनुसूचित जमाती (महिला) प्रवर्गासाठी राखीव ठरले आहे.

या निर्णयामुळे स्थानिक पातळीवर नव्या राजकीय समीकरणांची नांदी झाली आहे. अनेक इच्छुकांच्या आशा धुळीस मिळाल्या असून आता या आरक्षणानंतर कोणत्या महिला नेत्याला उमेदवारी मिळते, याकडे सर्वांचे लक्ष लागले आहे.

राजकीय वर्तुळात चर्चा सुरू झाली आहे की, या आरक्षणाने सिरोंच्यातील प्रबळ दावेदारांना मोठा धक्का बसला असून आगामी निवडणुकीचे चित्र पूर्णपणे बदलले आहे.
स्थानिक कार्यकर्त्यांमध्ये “सगळं भावीवर पाणी पेरलं गेलं” अशी प्रतिक्रिया उमटताना दिसत आहे.

दरम्यान, उपनगराध्यक्ष पद मात्र सुरक्षित असल्याने अनेक नेत्यांची नजर आता त्या पदावर स्थिरावली आहे.
राज्यभरातील १४७ नगरपंचायतींच्या आरक्षण सोडतीनंतर सिरोंचा नगरपंचायतीतील राजकारण नव्या वळणावर येईल, असा अंदाज व्यक्त केला जात आहे.

मंत्री माधुरी मिसाळ यांच्या अध्यक्षतेखाली पार पडलेल्या या सोडतीनंतर महाराष्ट्रभरातील नगरपंचायतींमध्ये राजकीय तापमान चांगलेच वाढले आहे.

—

– विदर्भ न्यूज 24, सिरोंचा प्रतिनिधी