इंदाराम उपक्षेत्रात पट्टेदार वाघाचा वावर; वन विभागाची तातडीची जनजागृती मोहीम सुरू…
अहेरी विदर्भ न्यूज 24 नेटवर्क प्रतिनिधी दिनांक:–07/12/2025
अहेरी तालुक्यातील इंदाराम उपक्षेत्रात पट्टेदार वाघाचा सक्रिय वावर आढळून आला असून, वन विभागाने संबंधित गावांमध्ये तातडीची जनजागृती मोहीम राबवली आहे. नुकत्याच झालेल्या जंगल पाहणीदरम्यान वनकर्मचाऱ्यांना गावालगत वाघाच्या हालचालींचे स्पष्ट चिन्ह दिसून आले. त्यानंतर क्षेत्रातील ग्रामस्थांना त्वरीत सूचना देण्यात आल्या असून, वन विभागाने सर्वांनी सावध राहण्याचे आवाहन केले आहे.
वनकर्मचाऱ्यांनी इंदाराम व आसपासच्या गावांमध्ये जाऊन ग्रामस्थांशी चर्चा करत परिस्थितीची माहिती दिली. वाघ गावांच्या जवळ येत असल्याने कोणतीही मानवहानी किंवा पशुधनाची हानी टाळण्यासाठी ग्रामस्थांनी नियमांचे काटेकोर पालन करणे अत्यावश्यक असल्याचे त्यांनी स्पष्ट केले. अनेक ग्रामीण भागात लोक रात्रीच्या वेळी शेतांमध्ये किंवा गोठ्याजवळ हालचाल करतात, तसेच गुराखी जनावरे चारण्यासाठी जवळच्या जंगलात जातात. मात्र, सद्यस्थितीत अशा हालचाली अधिक धोकादायक ठरू शकतात, असा इशारा वन विभागाने दिला.
स्थानिक जनतेने रात्रीच्या वेळी अनावश्यक फिरणे, अंगणात झोपणे किंवा एकट्याने शेतावर जाणे टाळावे, पाळीव जनावरांना सुरक्षित जागी ठेवावे आणि कोणतीही संशयास्पद हालचाल दिसताच तात्काळ वन विभागाला कळवावे, असे आवाहन करण्यात आले. वन्य प्राणी आणि मानव यांच्यातील संघर्ष टाळण्यासाठी हे उपाय महत्त्वाचे असून प्रत्येक ग्रामस्थाची जबाबदारीही तितकीच महत्वाची असल्याचे वन विभागाचे क्षेत्र सहाय्यक यांनी सांगितले.
यासंदर्भातील पत्राची प्रत वनपरिक्षेत्र अधिकारी, प्रादेशिक अहेरी यांना सादर करण्यात आली आहे. वाघाच्या सततच्या हालचालींमुळे वन विभागाने सतर्कता वाढवली असून, परिसरात गस्तही वाढवण्यात आली आहे. ग्रामस्थांनी थोडी सावधगिरी आणि सहकार्य दाखवले, तर कोणत्याही प्रकारची दुर्घटना टाळणे शक्य असल्याचा विश्वास वन विभागाने व्यक्त केला आहे.
इंदारामसह उपक्षेत्रातील ग्रामस्थांमध्ये या जनजागृतीमुळे भीतीपेक्षा सजगता वाढण्यास मदत होत असून, वन विभाग मानव–वन्यजीव संघर्ष रोखण्यासाठी कटिबद्ध असल्याचे स्पष्ट झाले आहे.
