लॉईड्स ग्रुपकडून १,६९२ कर्मचाऱ्यांना ESOPs चे वाटप; गडचिरोलीत औद्योगिक भागीदारीला नवी दिशा

सुरजागड विशेष प्रतिनिधी दिनांक: –16 डिसेंबर 2025

        उत्कृष्ट कार्यसंस्कृती, कर्मचारी-केंद्रित धोरण आणि सामाजिक बांधिलकी यांचा आदर्श घालून देणाऱ्या लॉईड्स मेटल्स अँड एनर्जी लिमिटेड (LMEL) ने गडचिरोली जिल्ह्यात पुन्हा एकदा मोठे परिवर्तन घडवून आणले आहे. व्यवस्थापकीय संचालक श्री. बी. प्रभाकरन यांच्या नेतृत्वाखाली, एकेकाळी नक्षलवादासाठी ओळखल्या जाणाऱ्या या दुर्गम भागाला विकसित औद्योगिक केंद्रात रूपांतरित करण्याचा लॉईड्स समूहाचा प्रवास अधिक भक्कम होत आहे.

कॉर्पोरेट क्षेत्रात कर्मचारी सहभागाचा आदर्श निर्माण करत, लॉईड्स मेटल्सने सातत्याने कर्मचारी स्टॉक ओनरशिप प्लॅन (ESOP) राबविला आहे. आतापर्यंत कंपनीकडून १०,६३१ कर्मचाऱ्यांना ESOP शेअर्सचे वाटप करण्यात आले असून, सोमवारी सुरजागड येथील हेडरी झोन मध्ये आयोजित विशेष ESOP वितरण समारंभात १,६९२ कर्मचाऱ्यांना स्टॉक ओनरशिपचे लाभ देण्यात आले.

या उपक्रमामुळे कर्मचाऱ्यांना केवळ आर्थिक सुरक्षितताच मिळत नाही, तर कंपनीच्या प्रगतीत दिलेल्या योगदानाचा थेट सन्मानही मिळतो. “कामगार ते भागीदार” हा प्रवास प्रत्यक्षात उतरवणारा हा उपक्रम गडचिरोलीच्या औद्योगिक इतिहासातील महत्त्वाचा टप्पा ठरत आहे.

कार्यक्रमाची सुरुवात पारंपरिक दीपप्रज्वलनाने झाली. यानंतर छत्रपती शिवाजी महाराज आणि भगवान बिरसा मुंडा यांच्या प्रतिमांना आदरांजली अर्पण करण्यात आली. उपस्थित मान्यवरांचे पुष्पगुच्छ देऊन स्वागत करण्यात आले.

कर्मचाऱ्यांना संबोधित करताना श्री. बी. प्रभाकरन यांनी ESOP प्राप्त कर्मचाऱ्यांचे अभिनंदन करत स्पष्ट शब्दांत सांगितले की,
“आजपासून तुम्ही केवळ कर्मचारी नाही, तर कंपनीचे भागीदार आहात.”
कर्मचाऱ्यांच्या समर्पणामुळेच LMEL ने झपाट्याने प्रगती केली असून, त्याचा थेट फायदा गडचिरोली जिल्ह्याच्या सर्वांगीण विकासाला होत असल्याचे त्यांनी नमूद केले. मेहनती, कौशल्यवान तरुणांना जागतिक स्तरावर सक्षम व्यावसायिक म्हणून घडविणे हीच कंपनीची दीर्घकालीन दृष्टी असल्याचेही त्यांनी स्पष्ट केले.

श्री. प्रभाकरन यांनी मुख्यमंत्री देवेंद्र फडणवीस यांच्या दूरदृष्टीचा उल्लेख करत सांगितले की, गडचिरोलीला मुख्य प्रवाहात आणण्याचे स्वप्न त्यांनी पाहिले होते आणि लॉईड्स मेटल्स त्या स्वप्नाची अंमलबजावणी प्रत्यक्षात करत आहे. या विकास प्रक्रियेत कर्मचाऱ्यांनी पूर्ण क्षमतेने योगदान द्यावे, कारण हे कार्य केवळ उद्योगाचे नसून राष्ट्रसेवेचे आहे, असेही त्यांनी ठामपणे सांगितले.

आपली दीर्घकालीन बांधिलकी अधोरेखित करताना त्यांनी गडचिरोलीला “नवीन जमशेदपूर” बनवण्याची महत्त्वाकांक्षा पुन्हा व्यक्त केली. जमशेटजी टाटा यांनी पोलाद उद्योगाची पायाभरणी करून कसा जागतिक स्तरावर टाटा समूह उभा केला, याचा संदर्भ देत त्यांनी सांगितले की, त्याच धर्तीवर LMEL आणि गडचिरोली एकत्र वाढतील. भविष्यात LMEL मधीलच एखादा कर्मचारी कंपनीचा संचालक बनेल, असा विश्वासही त्यांनी व्यक्त केला.

भाषणाच्या शेवटी, या दुर्गम भागात सेवा देणाऱ्या डॉक्टर, अभियंते आणि सुरक्षा कर्मचाऱ्यांचे त्यांनी विशेष आभार मानले. सुरक्षित, समावेशक आणि समान संधी देणारे कार्य वातावरण निर्माण करण्यात सुरक्षा यंत्रणेची भूमिका अत्यंत महत्त्वाची असल्याचे त्यांनी नमूद केले. येथे पुरुष आणि स्त्रिया दोघेही समान समर्पणाने योगदान देत असल्याचा गौरवपूर्ण उल्लेख त्यांनी केला.

ESOP वितरणाच्या माध्यमातून लॉईड्स मेटल्सने केवळ कर्मचारी सक्षमीकरणाचाच नव्हे, तर गडचिरोलीच्या सामाजिक-आर्थिक परिवर्तनाचाही ठोस संदेश दिला आहे.
उद्योग, कर्मचारी आणि परिसर—तीनही घटक एकत्र वाढत आहेत, हेच या उपक्रमाचे खरे यश आहे.