गडचिरोलीत अवैध दारुवाहतुकीवर पोलिसांचा धडाका…

विदर्भ न्यूज 24 – गडचिरोली
दिनांक : 24 नोव्हेंबर 2025

गडचिरोली जिल्ह्यात दारूबंदी अस्तित्वात असताना अवैध दारू विक्री आणि वाहतूक रोखण्यासाठी पोलिस अधीक्षक नीलोत्पल यांच्या आदेशानुसार कडक मोहीम सुरू आहे. नगर परिषद सार्वत्रिक निवडणुकीच्या पार्श्वभूमीवर आचारसंहिता लागू असताना गडचिरोली शहर पोलीस स्टेशन हद्दीत सहा ठिकाणी स्थिर तपासणी पथके तैनात करण्यात आली आहेत. या पथकांनी पारडी नाक्यावर सलग दोन दिवसांत केलेल्या कारवायांत अवैधरित्या दारू लपवून वाहतूक करणाऱ्या एका पुरुष आणि एका महिलेवर गुन्हे दाखल करत एकूण 96 हजार रुपयांचा मुद्देमाल जप्त केला आहे.

पहिल्या प्रकरणात, 23 नोव्हेंबर रोजी पारडी नाक्यावर तपासणी सुरू असताना गडचिरोलीकडे येणारी एक निळ्या रंगाची पल्सर मोटारसायकल संशय आल्याने थांबवण्यात आली. वाहनचालक तानाजी नानाजी पेंदोरकर हा हैदराबादहून आलेला असून सध्या व्याहाड बु. येथे वास्तव्यास होता. वाहनाची तपासणी करताना पोलिसांना धक्काच बसला, कारण मोटारसायकलच्या पेट्रोल टाकीत खास बनावट पोकळी तयार करून त्यात रॉयल स्टॅग डिलक्स व्हिस्कीच्या 40 सिलबंद बॉटली लपवून नेल्या जात असल्याचे उघड झाले. अवैध मालासह वाहन जप्त करण्यात आले असून एकूण किंमत 86 हजार रुपये ठरली. या प्रकरणी गडचिरोली पोलीस स्टेशनमध्ये अप. क्र. 1232/2025 नोंदवून आरोपीला अटक करण्यात आली.

दुसऱ्या प्रकरणात, 22 नोव्हेंबर रोजी याच पारडी नाक्यावर तपासणीदरम्यान चंद्रपूरहून आलेल्या एसटी बसमधील प्रवाशांची तपासणी केली जात होती. या वेळी गुलाबी रंगाचा स्टोल पांघरून बसलेली 65 वर्षीय ललीता सुधाकर महामंढरे ही महिला संशयास्पद वाटल्याने तिची तपासणी करण्यात आली. तिच्या अंगातील जॅकेटमध्ये देशी दारूच्या 90 एम.एल. मापाच्या तब्बल 90 निपा लपवलेल्या अवस्थेत आढळल्या. तसेच तिच्याकडे असलेला मोबाईलदेखील जप्त करण्यात आला. या कारवाईचा एकूण मुद्देमाल 10 हजार रुपये ठरला असून तिच्याविरोधात अप. क्र. 1225/2025 नोंदवण्यात आला आहे.

अवैध मद्याच्या पुरवठ्याला आळा घालण्यासाठी गडचिरोली पोलिसांनी केलेल्या या सलग कारवाया अत्यंत महत्त्वाच्या ठरल्या आहेत. दोन्ही प्रकरणांचा तपास पोउपनि. शिवाजी देशमुख व मपोउपनि. पूजा नैताम यांच्या मार्गदर्शनाखाली सुरू आहे. संपूर्ण कारवाई पोलिस अधीक्षक नीलोत्पल, अपर पोलिस अधीक्षक (अभियान) एम. रमेश आणि अपर पोलिस अधीक्षक (प्रशासन) गोकुल राज जी यांच्या मार्गदर्शनाखाली पोनी विनोद चव्हाण यांच्या नेतृत्वात करण्यात आली.

गडचिरोलीसारख्या संवेदनशील जिल्ह्यात निवडणूक काळात अवैध दारू वाहतूक रोखण्यासाठी पोलिसांनी दाखवलेली तत्परता आणि तपासणी पथकांची जागरूकता यामुळे कायदा-सुव्यवस्थेला मोठे बळ मिळाले असून, जिल्हा पोलिस दलाची ही कारवाई नागरिकांतही समाधानाची भावना निर्माण करणारी ठरली आहे

.https://www.facebook.com/share/v/17UdqSpNVe/