न वारा, न पाऊस, न उष्णता… तरीही आठ तासांपासून सिरोंचा तालुका अंधारात

सिरोंचा | प्रतिनिधी  दिनांक 24 डिसेंबर 2025
सिरोंचा तालुक्यात आज तब्बल आठ तासांहून अधिक काळ विद्युत पुरवठा पूर्णतः खंडित राहिल्याने संपूर्ण तालुका अंधारात गेला. विशेष म्हणजे या घटनेमागे कोणताही नैसर्गिक अडथळा नसताना — ना वारा, ना पाऊस, ना अती उष्णता — तरीही वीज पुरवठा बंद असल्याने विद्युत विभागाच्या कार्यपद्धतीवर गंभीर प्रश्नचिन्ह निर्माण झाले आहे.
सध्या हिवाळ्याचे दिवस सुरू असून तापमान तुलनेने स्थिर आहे. अशा परिस्थितीतही वीज गायब होणे म्हणजे हा केवळ तांत्रिक बिघाड नसून निकृष्ट मेंटेनन्स आणि अधिकाऱ्यांच्या निष्काळजीपणाचे जिवंत उदाहरण असल्याचे नागरिकांचे म्हणणे आहे.
पावसाळा, उन्हाळा, हिवाळा – कारणे बदलतात; अंधार मात्र कायम
सिरोंचा तालुक्यात विद्युत पुरवठा खंडित होणे ही आता नेहमीची बाब बनली आहे. पावसाळ्यात वीज गेली की विद्युत विभागाकडून वारा, पाऊस, झाड पडले असे उत्तर दिले जाते.
उन्हाळ्यात वीज गेली की अती उष्णतेमुळे लाईन बिघडली असे सांगितले जाते.
आता हिवाळ्याचे दिवस सुरू असताना, ना पाऊस, ना उष्णता, ना वादळ — तरीही वीज खंडित असल्याने प्रश्न उपस्थित होत आहे की विद्युत विभागाकडे ठोस उत्तर आहे का, की फक्त कारणांची यादी तयार ठेवलेली आहे?
निकृष्ट मेंटेनन्स आणि जबाबदारीपासून पळवाट
स्थानिक नागरिकांच्या मते, सिरोंचा तालुक्यातील विद्युत यंत्रणा पूर्णतः दुर्लक्षित अवस्थेत आहे. जुनाट वाहिन्या, वेळेवर न होणारी दुरुस्ती, कोणतीही पूर्वतयारी नसणे आणि मेंटेनन्स केवळ कागदावरच होत असल्याचे चित्र आहे.
वीज खंडित झाल्यानंतर विद्युत कार्यालयात संपर्क साधण्याचा प्रयत्न केला असता अनेक वेळा फोन उचलले जात नाहीत. काही वेळा अधिकारी उपलब्ध नाहीत, सुट्टीवर आहेत अशी उत्तरे मिळतात. त्यामुळे नागरिकांच्या तक्रारी हवेतच विरून जातात.
अधिकारी सुट्टीवर, जनता अंधारात
स्थानिक पातळीवर विद्युत विभागातील जबाबदार अधिकारी मुख्यालयी अनुपस्थित असणे, वेळेवर घटनास्थळी न पोहोचणे आणि दुरुस्तीच्या कामाला विलंब होणे, ही बाब वारंवार समोर येत आहे.
नागरिकांमध्ये अशीही चर्चा आहे की काही अधिकारी आणि कर्मचारी प्रत्यक्ष कामापेक्षा इतर बाबींमध्ये अधिक व्यस्त असतात. परिणामी, त्याचा फटका थेट सामान्य जनतेला बसत असून कोणीही जबाबदारी स्वीकारायला तयार नाही.
बीएसएनएल सेवा दिवसभर ठप्प
वीज पुरवठा खंडित असतानाच आज बीएसएनएलची सेवा देखील दिवसभर बंद राहिली. अनेक दिवसांनी सुरू असलेली बीएसएनएल सेवा पुन्हा एकदा ठप्प झाल्याने सिरोंचा तालुक्यातील संपर्क व्यवस्था पूर्णतः कोलमडली.
फोन कॉल्स, इंटरनेट, ऑनलाइन सेवा बंद पडल्याने नागरिकांना मोठ्या अडचणींचा सामना करावा लागला. ग्रामीण व आदिवासी भागात खासगी नेटवर्क मर्यादित असल्याने बीएसएनएल बंद राहणे म्हणजे नागरिकांसाठी संपर्क तुटल्यासारखी स्थिती निर्माण झाली.
बँका व शासकीय कार्यालयांचे कामकाज बंद
वीज आणि नेटवर्क नसल्यामुळे तालुक्यातील अनेक बँका, शासकीय कार्यालये आणि खासगी आस्थापना दिवसभर बंद अवस्थेत होती. संगणकीकृत व्यवहार पूर्णतः ठप्प झाल्याने आर्थिक व्यवहार करता आले नाहीत.
दिवसभर रांगेत उभे राहूनही काम न झाल्याने नागरिकांचा संताप वाढला.
आदिवासी बांधवांना मोठा फटका
दुर्गम खेडेगावातून विविध कामांसाठी सिरोंचा तालुक्याच्या ठिकाणी आलेल्या आदिवासी बांधवांना या परिस्थितीचा सर्वाधिक त्रास सहन करावा लागला.
बँक व्यवहार, शासकीय कागदपत्रे, इतर आवश्यक कामांसाठी आलेले नागरिक दिवसभर ताटकळत राहिले. वेळ, पैसा आणि श्रम वाया गेल्याने त्यांना रिकाम्या हाताने परत जावे लागले.
“ही तांत्रिक अडचण नाही, ही व्यवस्थेची अपयशकथा आहे”
सिरोंचा तालुक्यात वारंवार होणारे वीज खंडित होणे, नेटवर्क समस्या आणि अधिकाऱ्यांची उदासीनता पाहता ही केवळ तांत्रिक अडचण नसून संपूर्ण व्यवस्थेची अपयशकथा असल्याचे नागरिक स्पष्टपणे बोलून दाखवत आहेत.
नागरिकांच्या ठोस मागण्या
या प्रकारानंतर नागरिकांनी पुढील मागण्या लावून धरल्या आहेत —
विद्युत विभागाच्या मेंटेनन्स कामांची सखोल चौकशी करावी
जबाबदार अधिकाऱ्यांवर कठोर कारवाई करावी
हिवाळा, उन्हाळा, पावसाळा कोणत्याही काळात अखंड वीजपुरवठा सुनिश्चित करावा
बीएसएनएल सेवेसाठी पर्यायी व्यवस्था तातडीने उभारावी
तक्रारींवर तत्काळ प्रतिसाद देणारी यंत्रणा कार्यान्वित करावी
अन्यथा, “ऋतू कोणताही असो, अंधार मात्र कायम” अशी ओळख सिरोंचा तालुक्याला लागेल, अशी भीती नागरिक व्यक्त करत आहेत.