“दुर्गम गडचिरोलीत ‘गोड’ विकास — हेडरीत पहिली उच्च दर्जाची बेकरी सुरू”
हेडरी गडचिरोली विशेष प्रतिनिधी दिनांक:-13ऑगस्ट2025
दुर्गम गडचिरोलीत आता विकासाची ‘गोड चव’ मिळू लागली आहे. सोमवारी हेडरी गावात पहिल्या उच्च दर्जाच्या ब्लॅक फॉरेस्ट बेकरी चे उद्घाटन करण्यात आले. या उपक्रमामुळे केवळ स्थानिकांना ताजे बेकरी पदार्थ मिळणार नाहीत, तर रोजगार आणि व्यवसायाच्या नवीन संधीही उपलब्ध होणार आहेत.
पुरसलगोंदीच्या सरपंच अरुणा सडमेक, तोडसाच्या सरपंच वनिता कोरामी, नागुलवाडीचे सरपंच नेवलू गावडे, तोडसाचे उपसरपंच प्रशांत आत्राम, नागुलवाडीचे उपसरपंच राजू तिम्मा, माजी सरपंच कात्या तेलामी व कल्पना आलाम, ग्रामपंचायत सदस्य छाया जेट्टी आणि लॉईड्स मेटल्स अँड एनर्जी लिमिटेड (एलएमईएल) चे व्यवस्थापकीय संचालक व लॉईड्स इन्फिनिट फाउंडेशनचे संचालक श्री. बी. प्रभाकरन यांच्या हस्ते हा समारंभ संपन्न झाला.
उद्घाटनावेळी बोलताना श्री. प्रभाकरन म्हणाले, “ही बेकरी केवळ इमारत नसून गडचिरोलीच्या दुर्गम भागातील लोकांपर्यंत पोहोचणाऱ्या विकासाचे प्रतिक आहे. ब्लॅक फॉरेस्ट बेकरीसारखे उपक्रम लोकांच्या जीवनशैलीत गोडवा आणतील आणि जिल्ह्याच्या सकारात्मक परिवर्तनाची गाथा पुढे नेतील.”
याआधी २७ जून रोजी कोनसरी गावात जिल्ह्यातील पहिल्या बेकरी व फूड प्लाझाचा शुभारंभ झाला होता. कोनसरी येथे एलएमईएलचे डीआरआय व पेलेट प्रकल्प कार्यरत असून, ४.५ एमटीपीए क्षमतेचा एकात्मिक पोलाद प्रकल्प प्रस्तावित आहे.
पूजन व उद्घाटनानंतर, श्री. प्रभाकरन यांनी हेडरीतील बेकरीला भेट देऊन एलएमईएल अधिकारी व स्थानिक ग्रामस्थांशी संवाद साधला.
चित्रासह: सरपंच, उपसरपंच व ग्रामपंचायत सदस्यांसह एलएमईएलचे संचालक बी. प्रभाकरन, हेडरी गावातील पहिल्या उच्च दर्जाच्या बेकरीचे उद्घाटन करताना.
