*नगर परिषद सार्वत्रिक निवडणूक २०२५: गडचिरोली जिल्ह्यातील निवडणूक तयारी पूर्ण*

गडचिरोली विशेष प्रतिनिधी दिनांक:-30/11/2025

नगर परिषद सार्वत्रिक निवडणूक २०२५ साठी निवडणूक यंत्रणा सज्ज झाली असून मतदारांनी जास्तीत जास्त संख्यने मतदानात सहभाग नोंदवावा व मतदानाचे कर्तव्य निभावून लोकशाही बळकट करण्याची जबाबदारी पूर्ण करावी, असे आवाहन जिल्हाधिकारी अविश्यांत पंडा यांनी यांनी केले आहे.

*१०५ मतदान केंद्रे ; ११७ मतदान पथके*
जिल्ह्यातील नगर परिषद सार्वत्रिक निवडणूक २०२५ साठी प्रशासकीय स्तरावर तयारी अंतिम टप्प्यात पोहोचली आहे. या निवडणुकीसाठी गडचिरोली, देसाईगंज आणि आरमोरी या तिन्ही नगर परिषदांमध्ये एकूण १०५ मतदान केंद्रे निश्चित करण्यात आली असून, निवडणुकीची प्रक्रिया पार पाडण्यासाठी एकूण ११७ मतदान पथके सज्ज आहेत. निवडणूक कर्मचाऱ्यांसाठी आवश्यक प्रशिक्षणाची प्रक्रिया वेळेत पूर्ण करण्यात आली आहे.

*निवडणूक तयारी आणि प्रशिक्षण*

गडचिरोली नगर परिषदेसाठी सर्वाधिक ४६ मतदान केंद्रे आणि ५१ मतदान पथके तैनात करण्यात आली आहेत, तर देसाईगंज नगर परिषदेत ३२ केंद्रे आणि ३६ पथके कार्यान्वित असतील. आरमोरी नगर परिषदेत २७ मतदान केंद्रे आणि ३० मतदान पथके तैनात आहेत.

गडचिरोली आणि आरमोरी नगर परिषदेच्या निवडणुक कर्मचाऱ्यांसाठी पहिले प्रशिक्षण १६ नोव्हेंबर २०२५ रोजी, तर दुसरे प्रशिक्षण २४ नोव्हेंबर २०२५ रोजी आयोजित करण्यात आले होते. दुसरीकडे, देसाईगंज नगर परिषदेसाठी पहिले प्रशिक्षण २० नोव्हेंबर २०२५ रोजी आणि दुसरे प्रशिक्षण २७ नोव्हेंबर २०२५ रोजी पार पडले आहे.

*नगराध्यक्षसाठी २६ तर नगरसेवकसाठी ३५२ उमेदवार*
या निवडणुकीत तिन्ही नगर परिषदांमधून अध्यक्ष आणि सदस्य पदांसाठी उमेदवारी अर्ज दाखल करणाऱ्यांची अंतिम संख्या देखील निश्चित झाली आहे. गडचिरोली नगर परिषदेत अध्यक्ष पदाकरिता ८ उमेदवार तर सदस्य पदाकरिता १३४ उमेदवार निवडणूक लढवत आहेत. देसाईगंज नगर परिषदेतही अध्यक्षपदासाठी ८ उमेदवार रिंगणात आहेत, तर सदस्य पदासाठी ११० उमेदवारांमध्ये चुरस पाहायला मिळत आहे. आरमोरी नगर परिषदेत अध्यक्ष पदासाठी सर्वाधिक १० उमेदवार आहेत आणि सदस्य पदासाठी १०८ उमेदवार निवडणूक लढवित आहेत.

*मतमोजणीची व्यवस्था*
मतदान प्रक्रियेनंतर होणारी मतमोजणी आणि ईव्हिएम मशीन तयार करण्याच्या प्रक्रियेसाठीची तयारी देखील झाली आहे. ईव्हिएम मशीन तयार करणे आणि मतमोजणीचे प्रशिक्षण २८ व २९ नोव्हेंबर २०२५ रोजी पार पडले आहे.
गडचिरोली नगरपरिषदेसाठीची मतमोजणी कृषी महाविद्यालय, सोनापुर या ठिकाणी होणार आहे. मतमोजणीकरिता पोस्टल बॅलेटसाठी एक आणि प्रत्यक्ष मतमोजणीसाठी तेरा असे एकूण चौदा टेबल निश्चित करण्यात आले आहेत.
देसाईगंज नगर परिषदेकरिता देसाईगंज नगर परिषद सांस्कृतिक सभागृहात येथे मतमोजणीसाठी दहा व पोस्टल बॅलेटचा एक असे एकूण अकरा टेबल उपलब्ध असतील.
आरमोरी नगर परिषदेसाठी तालुका लघु पशु वैद्यकीय चिकित्सालय येथे मतमोजणीसाठी पाच व पोस्टल बॅलेटचा एक असे एकूण सहा टेबल मतमोजणीसाठी असतील.