गडचिरोली विशेष प्रतिनिधी दिनांक:- 28 मे 2026
गडचिरोली जिल्ह्यात माओवादी चळवळीचा प्रभाव दिवसेंदिवस कमी होत असताना सुरक्षा यंत्रणांनी पुन्हा एकदा मोठी आणि निर्णायक कारवाई करत माओवाद्यांच्या गुप्त शस्त्रनिर्मिती कारखान्याचा पर्दाफाश केला आहे. महाराष्ट्र-छत्तीसगड सीमेवरील अतिदुर्गम जंगल परिसरात लपवून ठेवलेला मोठा शस्त्रसाठा, स्फोटके आणि शस्त्रनिर्मितीसाठी वापरले जाणारे साहित्य जप्त करण्यात आले असून घटनास्थळीच मोठ्या प्रमाणात साहित्य नष्ट करण्यात आले आहे.
गडचिरोली पोलीस दल आणि नारायणपूर (छत्तीसगड) पोलिसांनी संयुक्तरीत्या राबविलेल्या या आंतरराज्यीय मोहिमेमुळे माओवादी संघटनांना मोठा धक्का बसल्याचे मानले जात आहे. विशेष म्हणजे, आत्मसमर्पण केलेल्या माजी माओवाद्यांकडून मिळालेल्या गुप्त माहितीच्या आधारे ही मोहीम आखण्यात आली होती.
मिळालेल्या माहितीनुसार, पोस्टे काकूर, जिल्हा नारायणपूर (छत्तीसगड) येथून सुमारे सात किलोमीटर अंतरावर महाराष्ट्र-छत्तीसगड सीमेलगतच्या जंगल परिसरात माओवाद्यांनी शस्त्रनिर्मितीचे साहित्य आणि स्फोटके लपवून ठेवली होती. या माहितीची खातरजमा केल्यानंतर 26 मे रोजी विशेष अभियान पथक प्राणहिता, बीडीडीएस प्राणहिता आणि डीआरजी नारायणपूरच्या संयुक्त जवानांना शोधमोहीमेसाठी रवाना करण्यात आले.
27 मे रोजी सकाळपासून जंगल परिसरात सर्च ऑपरेशन सुरू करण्यात आले. बीडीडीएस पथकाने अत्यंत दक्षतेने परिसराची तपासणी केली असता जमिनीत आणि झाडाझुडपांच्या आड मोठ्या प्रमाणावर शस्त्रे व स्फोटके लपवून ठेवलेली आढळून आली. त्यानंतर जवानांनी संपूर्ण परिसर सील करून साहित्य जप्त करण्याची प्रक्रिया सुरू केली.
काय-काय मिळाले जंगलात?
या कारवाईत पोलिसांनी 01 इन्सास रायफल, 02 सिंगल शॉट रायफल, 02 नग 12 बोअर रायफल, एसएलआर रायफलची जिवंत काडतुसे, .303 रायफलची काडतुसे आणि 12 बोअर रायफलची काडतुसे असा मोठा शस्त्रसाठा जप्त केला. याशिवाय तब्बल 25 किलो आयईडी स्फोटक, 02 क्लेमोर, 110 डेटोनेटर, कॉर्टेक्स वायर आणि 500 पेक्षा अधिक बीजीएल सेल मिळून आले.
विशेष म्हणजे, घटनास्थळी शस्त्रनिर्मितीसाठी वापरण्यात येणाऱ्या 02 लेथ मशीन, मोटर, ग्राइंडर मशीन, इन्व्हर्टर, बॅटरी, वायर बंडल, सोलर प्लेट आणि ट्यूब लाँचरसारखे साहित्य देखील मिळाले. यावरून माओवादी संघटना जंगल परिसरातच गुप्त शस्त्रनिर्मिती केंद्र चालवत असल्याचे स्पष्ट झाले आहे.
सुरक्षा दलांवर घातपाताचा मोठा कट उधळला
पोलिस सूत्रांच्या माहितीनुसार, आगामी काळात सुरक्षा दलांवर मोठे हल्ले करण्यासाठी आणि नक्षल सप्ताह, निवडणुका किंवा विशेष मोहिमांच्या काळात घातपात घडवून आणण्यासाठी हे साहित्य वापरले जाणार होते. मात्र वेळेवर मिळालेल्या गुप्त माहितीद्वारे पोलिसांनी हा कट उधळून लावला.
गेल्या काही महिन्यांत गडचिरोली पोलिसांनी सातत्याने माओवादी नेटवर्कवर प्रहार करत अनेक तळ उद्ध्वस्त केले आहेत. मोठ्या प्रमाणावर आत्मसमर्पण, अटक आणि एन्काऊंटरमुळे माओवादी संघटनांची ताकद कमकुवत होत असल्याचे चित्र आहे. अशातच ही कारवाई माओवादी चळवळीला आणखी मोठा धक्का मानली जात आहे.
वरिष्ठ अधिकाऱ्यांच्या मार्गदर्शनाखाली यशस्वी मोहीम
ही मोहीम पोलीस अधीक्षक एम. रमेश यांच्या मार्गदर्शनाखाली पार पडली. यामध्ये अपर पोलीस अधीक्षक कार्तिक मधिरा, गोकुल राज जी., हर्षवर्धन बी. जे., पोलीस उप-अधीक्षक विशाल नागरगोजे आणि मनोज मंडावी यांचे नेतृत्व लाभले.
विशेष अभियान पथक प्राणहिता, बीडीडीएस प्राणहिता आणि डीआरजी नारायणपूरच्या जवानांनी अत्यंत धाडसाने आणि नियोजनबद्ध पद्धतीने ही मोहीम पूर्ण केली. सहभागी जवानांचे वरिष्ठ अधिकाऱ्यांनी कौतुक केले असून “ऑपरेशन अंतिम प्रहार” अंतर्गत पुढील काळातही अशाच प्रभावी कारवाया सुरू राहणार असल्याचे संकेत मिळत आहेत.
About the Author
