सिरोंचा विशेष प्रतिनिधी दिनांक : 11 ऑगस्ट 2026
सिरोंचा शहरातील महावितरण कंपनीच्या भोंगळ आणि निष्काळजी कारभाराचा फटका आता थेट नागरिकांना आणि व्यापाऱ्यांना बसत आहे. शहरातील वॉर्ड क्रमांक १, वॉर्ड क्रमांक २, वॉर्ड क्रमांक ५ तसेच मार्केट लाईन परिसरातील नागरिक मागील दहा दिवसांपासून कमी दाबाच्या विद्युतपुरवठ्यामुळे अक्षरशः त्रस्त झाले आहेत. एका ठिकाणी ट्रान्सफॉर्मर बिघडल्यानंतर त्याचा भार दुसऱ्या ट्रान्सफॉर्मरवर टाकण्यात आला; मात्र वाढलेल्या अतिरिक्त भारामुळे संपूर्ण परिसरातील वीजपुरवठा कोलमडल्याचे चित्र निर्माण झाले आहे.
सुमारे दहा दिवसांपूर्वी मार्केट लाईन परिसरातील ट्रान्सफॉर्मरमध्ये बिघाड झाल्यानंतर तो बंद पडला. त्यानंतर या ट्रान्सफॉर्मरवर अवलंबून असलेल्या ग्राहकांना दुसऱ्या ट्रान्सफॉर्मरवरून वीजपुरवठा जोडण्यात आला. मात्र एका ट्रान्सफॉर्मरवर अतिरिक्त भार टाकल्याने वॉर्ड क्रमांक १, २, ५ आणि मार्केट लाईन परिसरात आता सातत्याने कमी दाबाचा वीजपुरवठा होत आहे.
कमी दाबामुळे घरगुती ग्राहकांसह व्यापारी वर्गाचे मोठे नुकसान होत आहे. घरातील पाण्याच्या मोटारी, पंखे, एसी यांसारखी उपकरणे व्यवस्थित चालत नाहीत. अनेक वेळा मोटार सुरू होत नसल्याने नागरिकांना पाण्यासाठीही अडचणींचा सामना करावा लागत आहे. उकाड्याच्या दिवसांत पंखे आणि इतर विद्युत उपकरणे कमी दाबामुळे बंद पडत असल्याने नागरिकांचा संताप वाढला आहे.
विशेषतः मार्केट लाईनमधील व्यापाऱ्यांना या परिस्थितीचा मोठा फटका बसत आहे. कमी-जास्त दाबाच्या वीजपुरवठ्यामुळे झेरॉक्स मशीन, प्रिंटर, संगणक, फॅन आणि इतर विद्युत उपकरणांवर परिणाम होत असून काही उपकरणे बिघडण्याची भीती निर्माण झाली आहे. व्यवसायासाठी वीज अत्यावश्यक असताना दिवसेंदिवस अशी परिस्थिती कायम राहिल्याने व्यापाऱ्यांचे आर्थिक नुकसान होत आहे.
सर्वात संतापजनक बाब म्हणजे बिघडलेला ट्रान्सफॉर्मर बदलण्यासाठी महावितरणकडून गेल्या दहा दिवसांपासून केवळ आश्वासनांची खैरात सुरू आहे. नागरिकांनी आणि व्यापाऱ्यांनी संबंधित अधिकाऱ्यांकडे वारंवार पाठपुरावा केला असता, “आज लावतो”, “उद्या लावतो” अशी उत्तरे देण्यात येत असल्याचा आरोप नागरिकांनी केला आहे. मात्र प्रत्यक्षात ट्रान्सफॉर्मर बसविण्याची कार्यवाही अद्यापही झालेली नाही.
एक ट्रान्सफॉर्मर बदलण्यासाठी जर दहा ते पंधरा दिवसांचा कालावधी लागत असेल, तर महावितरणची आपत्कालीन यंत्रणा नेमकी काम करते तरी कशी? असा संतप्त सवाल नागरिकांकडून उपस्थित केला जात आहे. वीजपुरवठा ही मूलभूत गरज असताना बिघाड झाल्यानंतर तातडीने पर्यायी व्यवस्था करून कायमस्वरूपी दुरुस्ती करणे ही महावितरणची जबाबदारी आहे. मात्र सिरोंचा शहरातील परिस्थिती पाहता अधिकारी आणि कर्मचाऱ्यांच्या कार्यक्षमतेवरच प्रश्नचिन्ह निर्माण झाले आहे.
एका ट्रान्सफॉर्मरवर अतिरिक्त भार टाकून तात्पुरती व्यवस्था करण्यात आली; मात्र त्यानंतर निर्माण झालेल्या कमी दाबाच्या समस्येकडेही गांभीर्याने पाहिले जात नसल्याने नागरिकांमध्ये तीव्र नाराजी आहे. वीज बिल वेळेवर वसूल करण्यासाठी महावितरणची यंत्रणा तत्पर असते; मग ग्राहकांना सुरळीत वीजपुरवठा देण्याची वेळ आली की एवढी दिरंगाई का? असा सवाल नागरिक विचारत आहेत.
सिरोंचा शहरातील वाढती लोकसंख्या, व्यापारी प्रतिष्ठाने आणि घरगुती वीजग्राहकांची संख्या लक्षात घेता विद्युत यंत्रणेचे योग्य नियोजन करणे गरजेचे आहे. केवळ एका ट्रान्सफॉर्मरवर परिसराचा वाढता भार टाकून समस्या सोडविण्याचा प्रयत्न केल्यास भविष्यात आणखी गंभीर परिस्थिती निर्माण होऊ शकते.
दरम्यान, महावितरणच्या वरिष्ठ अधिकाऱ्यांनी या प्रकरणाची तातडीने दखल घेऊन बिघडलेला ट्रान्सफॉर्मर त्वरित बदलावा, कमी दाबाची समस्या कायमस्वरूपी दूर करावी आणि अतिरिक्त भाराचा प्रश्न सोडविण्यासाठी आवश्यक क्षमतेचा ट्रान्सफॉर्मर बसवावा, अशी मागणी नागरिक व व्यापाऱ्यांकडून होत आहे.
दहा दिवसांपासून नागरिकांना वेठीस धरून ठेवणाऱ्या या प्रकारामुळे महावितरणचा कारभार नेमका कोणाच्या सोयीसाठी चालतोय आणि ग्राहकांच्या समस्यांकडे कोण लक्ष देणार? असा संतप्त सवाल आता सिरोंचा शहरातून उपस्थित होत आहे.
“आज लावतो, उद्या लावतो” या आश्वासनांऐवजी आता प्रत्यक्ष ट्रान्सफॉर्मर कधी बसणार, याचे उत्तर महावितरणच्या अधिकाऱ्यांनी नागरिकांना द्यावे, अशी मागणी जोर धरत आहे.
About the Author
