गडचिरोली, विशेष प्रतिनिधी दिनांक:-27 ऑक्टोबर 2026
गडचिरोली जिल्ह्यात माओवादविरोधी अभियानाला मोठे यश मिळाले असून, वांगेतुरी पोलीस ठाण्याच्या हद्दीतील माचुवंचा जंगल परिसरात माओवाद्यांनी जमिनीत पुरून ठेवलेला मोठ्या प्रमाणातील शस्त्रसाठा व स्फोटक साहित्य गडचिरोली पोलिसांनी जप्त केले आहे. या कारवाईत पाच अग्निशस्त्रांसह १२ क्लेमोर, जिवंत क्लेमोर स्फोटक, बाटलीसदृश स्फोटक, १०० सुतळी बॉम्ब, वायरलेस माईक सेट, माओवादी गणवेशाचे कापड आणि इतर साहित्य हस्तगत करण्यात आले आहे. धोकादायक स्फोटक साहित्य वरिष्ठांच्या मार्गदर्शनाखाली बीडीडीएस पथकाने घटनास्थळीच नष्ट केले.
गडचिरोली जिल्ह्यात माओवादविरोधी अभियानाच्या माध्यमातून सुरक्षा दलांकडून सातत्याने प्रभावी कारवाई करण्यात येत आहे. जिल्ह्यातील दुर्गम व आंतरराज्यीय सीमावर्ती जंगलाचा फायदा घेत माओवादी संघटनांकडून सुरक्षा दलांना लक्ष्य करण्यासाठी तसेच घातपाताच्या कारवाया करण्याच्या उद्देशाने शस्त्रे आणि स्फोटक साहित्य तयार करून ते जंगल परिसरात जमिनीत लपवून ठेवले जात असल्याचे यापूर्वीही समोर आले आहे. माओवादी सप्ताह, निवडणुका तसेच अन्य संवेदनशील प्रसंगी सुरक्षा दलांवर घातपात करण्यासाठी या साहित्याचा वापर केला जाण्याची शक्यता असते.
माचुवंचा जंगल परिसरात माओवाद्यांनी मोठ्या प्रमाणावर अग्निशस्त्रे व स्फोटक साहित्य लपवून ठेवल्याची गोपनीय माहिती गडचिरोली पोलीस दलाला प्राप्त झाली होती. या माहितीच्या आधारे पोलीस अधीक्षक, गडचिरोली एम. रमेश यांच्या मार्गदर्शनाखाली २७ ऑक्टोबर रोजी पहाटे विशेष अभियान राबविण्यात आले. या अभियानासाठी विशेष अभियान पथक गडचिरोलीच्या चार तुकड्या आणि बीडीडीएसचे एक पथक जंगल परिसरात रवाना करण्यात आले.
विशेष अभियान पथकाने जंगल परिसरात शोधमोहीम सुरू केल्यानंतर बीडीडीएसच्या जवानांनी परिसराची अत्यंत काळजीपूर्वक तपासणी केली. यावेळी जमिनीत लपवून ठेवलेला शस्त्रसाठा आणि माओवादी साहित्य आढळून आले. तपासणीदरम्यान १२ नग क्लेमोर, एक १२ बोअर रायफल, तीन सिंगल शॉट रायफल, एक एअर गन, एक बाटलीसदृश स्फोटक आणि एक जिवंत क्लेमोर स्फोटक आढळून आले. त्यासोबतच एक वायरलेस माईक सेट, हत्याराचा एक लोअर हँडगार्ड, १०० सुतळी बॉम्ब, माओवादी गणवेशासाठी हिरव्या रंगाच्या कापडाच्या पाच जोड्या तसेच इतर माओवादी साहित्य पोलिसांनी ताब्यात घेतले.
जंगल परिसरात लपवून ठेवण्यात आलेल्या या शस्त्रसाठ्यामुळे भविष्यात सुरक्षा दलांविरोधात घातपाताची कारवाई होण्याची शक्यता होती. मात्र, पोलिसांच्या सतर्कतेमुळे हा शस्त्रसाठा वेळेत शोधून काढण्यात आल्याने संभाव्य धोका टळला आहे. विशेषतः जिवंत क्लेमोर आणि इतर स्फोटक साहित्य आढळल्याने या कारवाईचे गांभीर्य अधिक वाढले आहे. बीडीडीएस पथकाने आवश्यक सुरक्षा खबरदारी घेत धोकादायक स्फोटक साहित्य घटनास्थळीच नष्ट केले.
ही संपूर्ण कारवाई पोलीस अधीक्षक एम. रमेश यांच्या आदेशाने व मार्गदर्शनाखाली करण्यात आली. अपर पोलीस अधीक्षक (अभियान) कार्तिक मधीरा, अपर पोलीस अधीक्षक गोकुल राज जी., अपर पोलीस अधीक्षक अहेरी (प्राणहिता) हर्षवर्धन बी. जे. तसेच पोलीस उपअधीक्षक (अभियान) सुनिल उईके यांच्या देखरेखीखाली विशेष अभियान पथक, इंटेलिजन्स सेल आणि बीडीडीएस पथकातील जवानांनी ही कारवाई यशस्वीपणे पार पाडली.
गडचिरोली जिल्ह्यात माओवाद्यांच्या हालचालींवर सुरक्षा यंत्रणांकडून बारकाईने लक्ष ठेवण्यात येत असून, दुर्गम जंगल भागातही सातत्याने शोधमोहीम राबविण्यात येत आहे. माओवाद्यांनी भविष्यातील घातपातासाठी लपवून ठेवलेला हा शस्त्रसाठा पोलिसांनी जप्त केल्याने माओवादविरोधी अभियानाला आणखी एक महत्त्वपूर्ण यश मिळाले आहे. पोलीस अधीक्षक एम. रमेश यांनी या कारवाईत सहभागी सर्व अधिकारी आणि जवानांचे कौतुक केले आहे.
— विदर्भ न्यूज-24
About the Author
