आरमोरी–गडचिरोली महामार्गावर पहाटेची भीषण दुर्घटना — चार युवकांचा मृत्यू, दोन गंभीर जखमी; अज्ञात वाहन चालकाविरुद्ध सदोष मनुष्यवधाचा गुन्हा
गडचिरोली विदर्भ न्यूज24 वृत्तसेवा दिनांक:-08ऑगस्ट 2025
काल पहाटेच्या सुमारास आरमोरी–गडचिरोली राष्ट्रीय महामार्गावर घडलेल्या एका भीषण अपघाताने जिल्हा हादरला आहे. दुचाकीवरून प्रवास करणाऱ्या सहा युवकांना अज्ञात चारचाकी वाहनाने जोरदार धडक दिली. या अपघातात दोन युवकांचा घटनास्थळीच मृत्यू झाला, तर उर्वरित चार जखमींपैकी दोन युवकांनी उपचारादरम्यान प्राण गमावले. अशा प्रकारे या अपघातात एकूण चार जणांचा मृत्यू झाला आहे.
हेलिकॉप्टरद्वारे तातडीची मदत
दुर्घटनेत गंभीर जखमी झालेले दोन युवकांना तातडीने हेलिकॉप्टरच्या माध्यमातून नागपूर येथील खाजगी रुग्णालयात हलविण्यात आले. जिल्हा प्रशासन व लॉयड्स मेटल्स अँड एनर्जी लिमिटेडच्या साहाय्याने ही तातडीची मदत मिळाली. सध्या या दोन्ही युवकांची प्रकृती स्थिर असल्याची माहिती वैद्यकीय सूत्रांनी दिली आहे.
अज्ञात वाहन चालकाविरुद्ध गुन्हा
घटनेनंतर गडचिरोली पोलिसांनी त्वरीत चौकशी सुरू केली असून, गडचिरोली पोलीस स्टेशनमध्ये भारतीय न्याय संहिता कलम 105 (सदोष मनुष्यवध) अन्वये अज्ञात वाहन चालकाविरुद्ध गुन्हा नोंदविण्यात आला आहे. गडचिरोली पोलीस दलाची पाच विशेष पथके आरोपीचा शोध घेण्यासाठी आणि गुन्हा उघडकीस आणण्यासाठी कसोशीने प्रयत्न करत आहेत.
लवकर अटक होण्याची शक्यता
गडचिरोली पोलिसांनी दिलेल्या माहितीनुसार, तपासात महत्त्वाचे धागेदोरे मिळाले असून, आरोपी वाहनचालकाला लवकरच अटक करण्यात येणार आहे. घटनास्थळावरील CCTV फुटेज, स्थानिकांचे निवेदन आणि तांत्रिक पुरावे यांच्या आधारे तपास वेगाने सुरू आहे.
स्थानिकांमध्ये संतापाचे वातावरण
या दुर्घटनेने परिसरातील नागरिकांमध्ये प्रचंड संताप निर्माण झाला आहे. महामार्गावर वाढत्या वेगाच्या आणि बेदरकार वाहनचालकांच्या घटनांवर अंकुश ठेवण्यासाठी कठोर पावले उचलावीत, अशी मागणी स्थानिकांनी केली आहे.
