सुगंधित तंबाखू तस्करीवर गडचिरोली पोलिसांचा करारा घाव!

गडचिरोली विशेष प्रतिनिधी दिनांक:–10 ऑक्टोबर 2025

राज्यात प्रतिबंधित असलेल्या सुगंधित तंबाखूचा अवैध पुरवठा थांबविण्यासाठी गडचिरोली पोलीसांनी मोठी कारवाई करत एकाला अटक केली असून दोन आरोपी फरार झाले आहेत. या कारवाईत तब्बल 8 लाख 22 हजार 750 रुपयांचा सुगंधित तंबाखू व चारचाकी वाहनासह रोख रक्कम जप्त करण्यात आली आहे.

महाराष्ट्र शासनाने सुगंधित तंबाखूची विक्री व वाहतूक पूर्णपणे बंद केली आहे. मात्र या बंदीला चकवा देत काही तस्करांकडून अवैधरित्या वाहतूक सुरू असल्याची माहिती मिळाल्यानंतर, पोलीस अधीक्षक श्री. नीलोत्पल यांच्या आदेशानुसार स्थानिक गुन्हे शाखेने ही कारवाई केली.

कसा उघड झाला प्रकार

दिनांक 09 ऑक्टोबर रोजी स्थानिक गुन्हे शाखेला गोपनीय माहिती मिळाली की, ललीत राठी (रा. अर्जुनी मोरगाव) हा आपल्या चारचाकी वाहनातून देसाईगंज भागात मोठ्या प्रमाणात सुगंधित तंबाखूचा पुरवठा करणार आहे.
त्यावर पथकाने वडसा येथील आदर्श महाविद्यालयाजवळ सापळा रचला. त्यावेळी संशयास्पद ग्रे रंगाचे “मारुती इको” वाहन थांबवून काही माल उतरविताना दिसले. पोलिसांना पाहून एक इसम पळून गेला, तर वाहन चालक ललीत राठी पोलिसांच्या हाती सापडला.

तपासादरम्यान वाहनातून हिरव्या रंगाचे “होला हुक्का शिशा तंबाखू” (130 पॅकेट) आणि लाल रंगाचे “ईगल हुक्का तंबाखू” (154 पॅकेट) असे एकूण सुमारे 3 लाख 3 हजार रुपयांचा तंबाखूचा साठा, 3 लाख किंमतीचे वाहन आणि 2.19 लाख रुपये रोख असा एकूण 8.22 लाख रुपयांचा मुद्देमाल जप्त करण्यात आला.

गुन्हा नोंद व आरोपी

अन्न व औषध प्रशासन विभाग, गडचिरोली यांच्या फिर्यादीवरून देसाईगंज पोलीस ठाण्यात गुन्हा क्रमांक 518/2025 अंतर्गत भारतीय न्याय संहिता-2023 व अन्न सुरक्षा आणि मानके अधिनियम-2006 नुसार गुन्हा नोंदविण्यात आला आहे.
या प्रकरणातील मुख्य आरोपी ललीत गोपालदास राठी (41) याला अटक करण्यात आली असून, इतर दोघे —
1️⃣ रवी मोहनलाल खटवानी (रा. गोंदिया)
2️⃣ इंद्रकुमार नागदेवे (रा. वडसा) — हे दोघे फरार असून त्यांचा शोध सुरू आहे.

‍✈️ पोलिसांची उत्कृष्ट टीमवर्क

ही कारवाई पोलीस अधीक्षक नीलोत्पल, अपर पोलीस अधीक्षक एम. रमेश, सत्य साई कार्तिक, आणि गोकुल राज. जी. यांच्या मार्गदर्शनाखाली पोलीस निरीक्षक अरुण फेगडे यांच्या नेतृत्वात करण्यात आली. पथकात सपोनि. भगतसिंग दुलत, पोअं. राजु पंचफुलीवार, आणि चापोअं. दिपक लोणारे यांचा समावेश होता.
पुढील तपास सपोनि. प्रेमकुमार दांडेकर (पो.स्टे. देसाईगंज) करत आहेत.

— “गडचिरोली जिल्ह्यात कोणत्याही प्रकारच्या अवैध व्यवसायांना शरण जाणार नाही. कायदेशीर चौकट वापरून अशा सर्व तस्करीवर पोलिसांचा कठोर अंकुश राहील.”

— श्री. नीलोत्पल, पोलीस अधीक्षक, गडचिरोली

—