‘महावतार नरसिंह’च्या अभूतपूर्व यशानंतर भारतीय अ‍ॅनिमेशन चित्रपटाला नवा उभारी!
गडचिरोली, दिनांक 4 ऑगस्ट 2025 (विदर्भ न्यूज 24)
भारतीय संस्कृतीतील पौराणिक कथांना आधुनिक तंत्रज्ञानाच्या साहाय्याने नव्या पिढीसमोर मांडण्याचा प्रयत्न करणारा अ‍ॅनिमेशन चित्रपट ‘महावतार नरसिंह’ सध्या देशभरात प्रचंड गाजतोय. हिरण्यकशिपू व त्याच्या पुत्र प्रल्हाद यांच्यातील धार्मिक संघर्ष आणि प्रल्हादाची परमभक्ती या कथानकावर आधारित या चित्रपटाने रिलीजनंतर अवघ्या १० दिवसांत जगभरात १०० कोटी रुपयांचा टप्पा पार केला आहे.
भारतीय पौराणिकतेचा यशस्वी प्रवास
आपण लहानपणी आजीच्या तोंडून ऐकलेल्या रामायण, महाभारत, विष्णूच्या दशावतारांतील कथा आता आधुनिक तंत्रज्ञानाच्या माध्यमातून थेट चित्रपटगृहात अनुभवण्याची संधी *’महावतार नरसिंह’*ने प्रेक्षकांना दिली आहे. याआधी रामायण व महाभारत यांच्यावर आधारित अनेक चित्रपट व मालिका पाहायला मिळाल्या, परंतु भगवान विष्णूच्या दशावतारांवरील सशक्त व तांत्रिकदृष्ट्या समृद्ध अ‍ॅनिमेशन चित्रपटांची फारशी निर्मिती झालेली नाही.
कुटुंबवत्सल चित्रपट – पालकांची पहिली पसंती
आजच्या घडीला थिएटरमधील बहुतांश चित्रपट प्रौढ प्रेक्षकांना डोळ्यासमोर ठेवून तयार केले जातात. मात्र *‘महावतार नरसिंह’*ने पालक व लहानग्यांसाठी योग्य व भावनिकदृष्ट्या समृद्ध अशी एक पावन कथा मांडली आहे. त्यामुळे संपूर्ण कुटुंब एकत्र येऊन पाहण्यासारखा असा हा चित्रपट ठरतो.
कमी बजेटमध्ये प्रचंड कमाई
केवळ १५ कोटी रुपये इतक्या मर्यादित बजेटमध्ये तयार झालेला हा चित्रपट सध्या बॉक्स ऑफिसवर इतिहास रचतोय. सुप्रसिद्ध ट्रेड अ‍ॅनालिस्ट रमेश बाला यांनी सांगितले की, “ही कथा भारतीय संस्कृतीशी घट्ट जोडलेली आहे. त्यामुळे या चित्रपटाने प्रेक्षकांमध्ये विशेष आकर्षण निर्माण केले.” हिंदी भाषेत या चित्रपटाने आतापर्यंत ₹६५.६४ कोटींचा गल्ला जमवला असून, ऋषभ शेट्टीच्या ‘कांतारा’ (₹६९.७५ कोटी) च्या जवळ पोहोचला आहे.
भारतीय अ‍ॅनिमेशनला नवसंजीवनी
चित्रपट विश्लेषक तरण आदर्श यांनीही भारतीय अ‍ॅनिमेशन सिनेसृष्टीसाठी हा एक नवा अध्याय असल्याचे नमूद केले. “हॉलीवूडच्या अ‍ॅनिमेशनपटांना जितके प्रेक्षक मिळतात, तितकेच भारतातल्या पौराणिक कथांनाही प्रचंड प्रतिसाद मिळू शकतो, हे ‘महावतार नरसिंह’ने सिद्ध केले आहे,” असे ते म्हणाले.
️ ‘महावतार’ फ्रँचायझीचा विस्तृत आराखडा
‘महावतार नरसिंह’ हा *’महावतार फ्रँचायझी’*चा पहिला भाग असून पुढील काही वर्षांत भगवान विष्णूच्या इतर अवतारांवर आधारित चित्रपटांची मालिका सादर होणार आहे. त्यात ‘महावतार परशुराम’ (२०२७), ‘महावतार रघुनंदन’ (२०२९), ‘महावतार द्वारकाधीश’ (२०३१), ‘महावतार गोकुलानंद’ (२०३३), ‘महावतार कल्की – भाग १’ (२०३५) व ‘भाग २’ (२०३७) यांचा समावेश आहे.
क्लिम प्रोडक्शन्स निर्मित व होम्बळे फिल्म्स प्रस्तुत ही महत्त्वाकांक्षी मालिका केवळ मनोरंजनापुरती मर्यादित नसून भारतीय संस्कृतीची गौरवगाथा नव्या पिढीपर्यंत पोहोचवण्याचे कार्य करत आहे.
—
‘महावतार नरसिंह’ ही केवळ कथा नाही; ती एक संस्कृती पुनर्जन्माची चळवळ आहे.
️ – सादरकर्ते : संदीप राचर्लवार
विदर्भ न्यूज 24
✍ संपादक – विदर्भ न्यूज 24
www.vidarbhanews24.com
