रक्षाबंधनाच्या दिवशीच शौर्यचा बळी — जबाबदार कोण?….

(विदर्भ न्यूज 24 – संपादकीय) दिनांक 9 ऑगस्ट 202

रक्षाबंधन — हा सण म्हणजे भावंडांच्या नात्याचा, प्रेमाचा आणि संरक्षणाच्या वचनाचा दिवस. बहिण भावाला राखी बांधते, आणि भाऊ तिला आयुष्यभर रक्षण करण्याचे वचन देतो. पण याच दिवशी गडचिरोली जिल्ह्यातील अंकिसा गावात आठ वर्षांचा कुमार शौर्य संतोष कोकुवार याचा रस्त्यावरच मृतदेह पडलेला पाहून संपूर्ण गाव हळहळून गेला.

शौर्य काही गुन्हेगार नव्हता, समाजात काही चुकीचे करणारा नव्हता. तो फक्त आपल्या आई-वडिलांसोबत बहिणीला राखी बांधायला निघाला होता. पण एका उभ्या केलेल्या ट्रॅक्टर-ट्रॉलीने त्याचे आयुष्य संपवले. निष्काळजीपणे रस्त्यावर ठेवलेली ही ट्रॉली, अरुंद मार्ग, आणि त्यावर कोणाचेही नियंत्रण नसणे — हीच त्याची ‘फाशीची दोरी’ ठरली.

प्रश्न असा आहे की, आपल्या रस्त्यांवर अशा निष्काळजी वाहनचालकांना किती दिवस मोकळीक मिळणार आहे? का आपल्याकडे अशा घटनांनंतरही वाहतूक नियमांचे काटेकोर पालन होत नाही? का जबाबदार यंत्रणा तक्रारींवर कृती करण्याऐवजी केवळ कागदी पंचनामा करून थांबते?

रस्त्यावरील अतिक्रमण, उभी वाहने, नादुरुस्त ट्रॉली, तसेच गावोगाव पसरलेली ‘चलता-चलता’ निष्काळजी वृत्ती — हे सर्व मिळून अशा निरपराधांचे प्राण घेत आहेत. यासाठी फक्त वाहनचालक नव्हे, तर स्थानिक प्रशासन, वाहतूक विभाग आणि आपण सर्वच काही प्रमाणात दोषी आहोत. कारण आपण निष्काळजीपणाला चालना देतो, आणि जेव्हा बळी जातो तेव्हा काही दिवस हळहळ व्यक्त करतो, नंतर सर्व विसरून जातो.

आज शौर्यचा अंत्यविधी होईल. त्याची राख अजून ओलसर असतानाच पुढील एखादा शौर्य रस्त्यावर कुठेतरी प्राण गमावेल, जर आपण बदल घडवून आणला नाही तर.हे थांबवायचे असेल, तर रस्त्यावरील अतिक्रमणावर कठोर कारवाई, वाहन तपासणी मोहीम, आणि निष्काळजीपणे उभ्या वाहनांसाठी दंडात्मक शिक्षा तातडीने सुरू करणे गरजेचे आहे.

रक्षाबंधनाच्या दिवशीच एका बहिणीचा भाऊ गमावणे — हे केवळ त्या कुटुंबाचे दुःख नाही, तर संपूर्ण समाजाचे अपयश आहे.शौर्यला भावपूर्ण श्रद्धांजली आणि या अपघातातून जागे होण्याची आपणा सर्वांची जबाबदारी.

✍ संपादक – विदर्भ न्यूज 24
www.vidarbhanews24.com