गडचिरोली : कोपर्शी जंगलात मोठी चकमक; 14 लाखांचे बक्षीस घोषित असलेले चार जहाल माओवादी कंठस्नान

गडचिरोली, दि. 28 ऑगस्ट2025 (विदर्भ न्यूज 24) 
गडचिरोली पोलीस दल आणि केंद्रीय राखीव पोलीस दलाच्या (CRPF) संयुक्त कारवाईत महाराष्ट्र–छत्तीसगड सीमेवरील कोपर्शी जंगल परिसरात झालेल्या प्रखर चकमकीत चार जहाल माओवादी ठार करण्यात आले. यामध्ये पीपीसीएम दर्जाच्या एका वरिष्ठ कॅडरसह तीन सदस्य पदावरील माओवादींचा समावेश आहे. महाराष्ट्र शासनाने या चौघांवर एकत्रितपणे १४ लाख रुपयांचे बक्षिस जाहीर केले होते.

✦ चकमकीचा थरार

दिनांक 25 ऑगस्ट रोजी अपर पोलीस अधीक्षक (अभियान) श्री. एम. रमेश यांच्या नेतृत्वाखाली सी-60 च्या 20 तुकड्या व CRPF QAT च्या 2 तुकड्या कोपर्शी जंगल परिसरात रवाना झाल्या. सलग दोन दिवस प्रतिकूल हवामानात आणि सततच्या पावसात जवानांनी धाडसी अभियान चालू ठेवले.

27 ऑगस्ट रोजी सकाळी शोधमोहीम सुरू असताना माओवाद्यांनी पोलिस पथकांवर प्राणघातक गोळीबार सुरू केला. जवानांनी संयम राखत माओवाद्यांना शरण येण्याचे आवाहन केले, मात्र माओवादींनी आणखी तीव्र हल्ला केला. त्यावेळी जवानांनी स्वसंरक्षणासाठी प्रत्युत्तरादाखल गोळीबार करत सुमारे आठ तासांच्या चकमकीनंतर चार माओवादी ठार केले.

✦ मृत माओवादींची ओळख

चकमकीत ठार झालेल्या माओवादींची ओळख पुढीलप्रमाणे –

1. मालु पदा (वय 41 वर्षे) – कंपनी क्र.10, पद : पीपीसीएम, रा. बुर्गी (कांकेर, छ.ग.)बक्षिस : ₹6 लाख गुन्हे : 8 (चकमक-5, खून-1, जाळपोळ-1, इतर-1)

2. क्रांती उर्फ जमुना रैनु हलामी (वय 32 वर्षे) – कंपनी क्र.10 सदस्य, रा. बोधीनटोला, धानोरा (गडचिरोली)बक्षिस : ₹4 लाखगुन्हे : 27 (चकमक-13, खून-6, जाळपोळ-3, इतर-5)

3. ज्योती कुंजाम (वय 27 वर्षे) – अहेरी दलम सदस्य, रा. बस्तर (छ.ग.)बक्षिस : ₹2 लाखगुन्हे : 8 (चकमक-7, खून-1)

4. मंगी मडकाम (वय 22 वर्षे) – गट्टा दलम सदस्य, रा. बस्तर (छ.ग.)बक्षिस : ₹2 लाख गुन्हे : 3 (चकमक-2, इतर-1)

एकूण बक्षिसाची रक्कम – 14 लाख रुपये

✦ जप्त केलेली शस्त्रे व साहित्य

घटनास्थळावरून जवानांनी महत्त्वपूर्ण शस्त्रे आणि साहित्य जप्त केले –

SLR रायफल – 1

INSAS रायफल – 2

.303 रायफल – 1

जिवंत काडतुसे – 92 नग

वॉकी-टॉकी – 3

माओवादी साहित्य व दैनंदिन वापराचे साहित्य

✦ अधिकाऱ्यांचे नेतृत्व

हे अभियान अपर पोलीस महासंचालक (विशेष कृती) डॉ. छेरिंग दोरजे, विशेष पोलीस महानिरीक्षक (नक्षलविरोधी अभियान) नागपूर श्री. संदीप पाटील, पोलीस उप-महानिरीक्षक गडचिरोली श्री. अंकित गोयल, पोलीस अधीक्षक गडचिरोली श्री. नीलोत्पल यांच्या मार्गदर्शनाखाली यशस्वीपणे राबविण्यात आले.

सी-60 आणि CRPF च्या जवानांना अपर पोलीस अधीक्षक (अभियान) श्री. एम. रमेश यांचे थेट नेतृत्व लाभले. तसेच अपर पोलीस अधीक्षक (प्राणहिता) श्री. सत्य साई कार्तिक, अपर पोलीस अधीक्षक (प्रशासन) श्री. गोकुल राज जी., पोलीस उपअधीक्षक (अभियान) श्री. विशाल नागरगोजे आणि सपोनि. राहुल देवडे (प्राणहिता सी-60 प्रभारी) यांनी महत्त्वाची भूमिका बजावली.

✦ नक्षलवादाविरुद्ध गडचिरोली पोलिसांची मोहीम

सन 2021 पासून आजपर्यंत गडचिरोली पोलिसांच्या सततच्या प्रयत्नांमुळे –

91 कट्टर माओवादी कंठस्नान

128 माओवादी अटकेत

75 माओवादी आत्मसमर्पण

या सातत्यपूर्ण प्रयत्नांमुळे जिल्ह्यात नक्षलवाद कमकुवत होत असून नागरिकांमध्ये विश्वास वाढला आहे.

✦ पोलीस अधीक्षक नीलोत्पल यांचे आवाहन

या यशस्वी अभियानाबद्दल पोलीस अधीक्षक श्री. नीलोत्पल यांनी जवानांचे कौतुक करताना सांगितले –
“जिल्ह्यात शांतता प्रस्थापित करण्यासाठी गडचिरोली पोलिसांची माओवादविरोधी कारवाई आणखी तीव्र करण्यात येईल. सर्व माओवादींनी हिंसक मार्ग सोडून आत्मसमर्पण करून मुख्य प्रवाहात सामील व्हावे, असे आम्ही आवाहन करतो.”

–— या प्रखर चकमकीमुळे पुन्हा एकदा गडचिरोली पोलिस दलाने नक्षलवाद्यांच्या विळख्यातून जिल्हा मुक्त करण्याच्या लढाईला गती दिली आहे.