लॉईड्स स्पोर्ट्स अकादमीची दुहेरी क्रीडा कामगिरी — व्हॉलीबॉल चॅम्पियनशिप विजेतेपद आणि उंच उडीमध्ये रौप्य पदक “

गडचिरोली विशेष प्रतिनिधी दिनांक:- सप्टेंबर 2025

गडचिरोली जिल्ह्यातील लॉईड्स इन्फिनिट फाऊंडेशन अंतर्गत कार्यरत लॉईड्स स्पोर्ट्स अकादमी (एलएसए) ने राज्यस्तरीय क्रीडा स्पर्धांमध्ये दुहेरी यश मिळवत गडचिरोलीचे नाव पुन्हा एकदा क्रीडाक्षेत्रात झळकावले आहे.

रामनगर (गोंदिया) येथे नुकत्याच पार पडलेल्या राज्यस्तरीय व्हॉलीबॉल स्पर्धेत एलएसए संघाने अंतिम सामन्यात २-० असा निर्णायक विजय मिळवत चॅम्पियनशिप ट्रॉफी पटकावली. या स्पर्धेत राज्यभरातील १६ बलाढ्य संघांचा सहभाग होता. निर्णायक क्षणी खेळाडूंनी दाखविलेली एकजूट, कौशल्य आणि लढाऊ वृत्ती यामुळे एलएसएच्या या संघाला विजेतेपद मिळाले.

दरम्यान, पुणे येथे २ ते ५ सप्टेंबर दरम्यान आयोजित राज्यस्तरीय अ‍ॅथलेटिक्स चॅम्पियनशिपमध्ये गडचिरोलीच्या क्रीडा रत्नाने चमक दाखवली. एलएसएच्या प्रशिक्षणार्थी सुश्री मोनिका मडावी यांनी २० वर्षांखालील महिलांच्या उंच उडी स्पर्धेत १.४० मीटर उडी मारत रौप्य पदक जिंकले. महाराष्ट्रातील ३६ जिल्ह्यांमधून तब्बल २,१०० खेळाडूंनी सहभाग घेतलेल्या या प्रतिष्ठित स्पर्धेत मोनिकाने केलेली कामगिरी उल्लेखनीय ठरली.

या यशामुळे सुश्री मोनिका मडावी यांची निवड १८ ते २० सप्टेंबर दरम्यान मध्य प्रदेश येथे होणाऱ्या पश्चिम विभागीय अ‍ॅथलेटिक्स चॅम्पियनशिपसाठी झाली आहे. या स्पर्धेत महाराष्ट्रासह मध्य प्रदेश, गुजरात, राजस्थान आणि गोवा येथील अव्वल खेळाडूंचा सहभाग असेल. राष्ट्रीय स्तरावर पोहोचण्यासाठीचा हा महत्त्वपूर्ण टप्पा असल्याचे क्रीडा क्षेत्रातील जाणकारांचे म्हणणे आहे.

एलएसएच्या प्रवक्त्याने सांगितले की,
“हे यश ग्रामीण व आदिवासी बहुल भागातील तरुणाईतील दडलेली क्रीडा प्रतिभा जागतिक स्तरावर झळकवण्याच्या आमच्या वचनबद्धतेचे प्रतीक आहे. आमचे उद्दिष्ट प्रत्येक खेळाडूला राज्य, राष्ट्रीय आणि आंतरराष्ट्रीय स्तरावर यश मिळवून देण्यासाठी जागतिक दर्जाचे प्रशिक्षण देणे आहे.”

       एलएसएच्या या दुहेरी यशामुळे गडचिरोलीला महाराष्ट्रातील उदयोन्मुख क्रीडा केंद्र म्हणून नवी ओळख मिळत आहे.