अहेरी विशेष प्रतिनिधी दिनांक:-11 जुन 2026
अहेरी तालुक्यातील दामरंचा परिसरातील इंद्रावती नदीपात्रातून सुरू असलेल्या कथित अवैध रेती उत्खननाविरोधात जनकल्याण समाजोन्नती अन्याय, भ्रष्टाचार निवारण समिती, महाराष्ट्रच्या वतीने प्रशासनाकडे तातडीने कारवाईची मागणी करण्यात आली आहे. या संदर्भात समितीने उपविभागीय अधिकारी, अहेरी यांना सविस्तर निवेदन सादर करून नदीपात्रातील सुरू असलेल्या रेती उपशाची चौकशी करण्याची मागणी केली आहे.
निवेदनानुसार, महाराष्ट्र-छत्तीसगड सीमेलगत वाहणाऱ्या इंद्रावती नदीत पोकलेन मशीनच्या सहाय्याने मोठ्या प्रमाणावर रेतीचे उत्खनन सुरू असून यामुळे नदीपात्राचे स्वरूप बदलण्याचा आणि पर्यावरणीय समतोल बिघडण्याचा धोका निर्माण झाला आहे. संबंधित विभागांच्या दुर्लक्षामुळे हा प्रकार सुरू असल्याचा आरोप समितीने केला आहे.
समितीच्या पदाधिकाऱ्यांनी प्रत्यक्ष पाहणीदरम्यान नदीपात्रात मोठ्या प्रमाणावर रेती उपसा सुरू असल्याचे पाहिल्याचा दावा केला आहे. उत्खननातून काढण्यात आलेली रेती तेलंगणा राज्यातील वाहनांच्या माध्यमातून वाहून नेली जात असल्याचेही निवेदनात नमूद करण्यात आले आहे. त्यामुळे महसूल विभाग, खनिकर्म विभाग आणि स्थानिक प्रशासनाच्या कार्यपद्धतीवरही प्रश्नचिन्ह निर्माण झाले आहे.
स्थानिक नागरिकांच्या मते, गावातील बांधकामे, घरकुल योजना आणि इतर विकासकामांसाठी आवश्यक असलेली रेती सहज उपलब्ध होत नसताना मोठ्या प्रमाणावर नदीतील रेती बाहेर नेली जात असल्याने नागरिकांना आर्थिक व व्यवहारिक अडचणींचा सामना करावा लागत आहे. यामुळे स्थानिकांमध्ये नाराजीचे वातावरण निर्माण झाले आहे.
जनकल्याण समाजोन्नती अन्याय, भ्रष्टाचार निवारण समितीचे जिल्हाध्यक्ष संतोष ताटीकोंडावार यांनी या प्रकरणाची सखोल चौकशी करून संबंधित कंत्राटदार, उत्खनन करणारे घटक आणि जबाबदार शासकीय अधिकाऱ्यांवर फौजदारी गुन्हे दाखल करण्याची मागणी केली आहे. तसेच अवैधरित्या उपसा करण्यात आलेली रेती व वाहतुकीसाठी वापरली जाणारी वाहने जप्त करून कठोर कारवाई करावी, अशी मागणीही त्यांनी केली आहे.
दरम्यान, इंद्रावती नदी ही परिसरातील महत्त्वाची जीवनवाहिनी मानली जाते. नदीपात्रातील अनियंत्रित उत्खननामुळे भूजल पातळीवर परिणाम होण्याची, नदीकाठावरील शेतीचे नुकसान होण्याची तसेच जैवविविधतेला धोका निर्माण होण्याची शक्यता पर्यावरण अभ्यासकांकडून व्यक्त केली जात आहे. याशिवाय शासनाच्या महसुलालाही मोठा फटका बसत असल्याचे नागरिकांचे म्हणणे आहे.
दामरंचा ग्रामसभेचे अध्यक्ष तथा माजी सरपंच जिलकरशाही मडावी यांनीही प्रशासनाने या प्रकरणाकडे गांभीर्याने लक्ष देऊन तातडीने संयुक्त तपास मोहीम राबवावी, अशी मागणी केली आहे. अवैध उत्खननावर वेळीच लगाम न घातल्यास भविष्यात नदीपात्राचे अपरिमित नुकसान होऊ शकते, असा इशाराही त्यांनी दिला.
आता प्रशासन या गंभीर आरोपांची दखल घेऊन प्रत्यक्ष पाहणी व चौकशी करून कोणती कारवाई करते, याकडे दामरंचा परिसरातील नागरिकांचे लक्ष लागले आहे.
Tags: #IndravatiRiver #IllegalSandMining #Aheri #Damarancha #Gadchiroli #SandExcavation #SantoshTatikondawar #JilkarshahiMadavi #VidarbhaNews24 #EnvironmentalProtection #RevenueLoss #AheriNews #GadchiroliNews
About the Author
