सीमाभागातून विकासाच्या प्रवासाकडे — मुख्यमंत्री फडणवीस यांच्या संकल्पनेतून सिरोंचाचा कायापालट!

सिरोंचा विदर्भ न्यूज 24,                                                   ✍️ संदीप राचर्लावार                                                  दिनांक  07 नोव्हेंबर 2025

गडचिरोली जिल्ह्यातील सिरोंचा तालुका — महाराष्ट्र, छत्तीसगड आणि तेलंगणा या तीन राज्यांच्या सीमांवर वसलेला प्रदेश, जो आजवर विकासाच्या मुख्य प्रवाहापासून काहीसा मागे राहिला होता. पण आता या भागाच्या इतिहासात एक नवे सुवर्णपान लिहिले जाणार आहे. मुख्यमंत्री देवेंद्र फडणवीस यांच्या दूरदृष्टीतून आणि राणा शिपिंग कंपनीचे संचालक राणा सूर्यवंशी यांच्या पुढाकारातून सिरोंचात तब्बल 1468 कोटी रुपयांचा “मेडिकल आणि इंजिनिअरिंग हब” प्रकल्प आकार घेत आहे.

हा प्रकल्प 264 एकर क्षेत्रात सिरोंचा-अंकीसा राष्ट्रीय महामार्गावर राजेश्वरपल्ली परिसरात उभारण्यात येणार असून, या माध्यमातून सीमाभागातील आदिवासी समाजाचे जीवनमान उंचावण्याचे स्वप्न साकार होणार आहे. मुख्यमंत्री फडणवीस यांच्या संकल्पनेतून उभा राहणारा हा प्रकल्प म्हणजे सिरोंचा आणि दक्षिण गडचिरोलीसाठी “विकासाचा टर्निंग पॉईंट” ठरणार आहे.

––आरोग्य क्षेत्रात ऐतिहासिक झेप

सिरोंचासारख्या दुर्गम भागात आरोग्याच्या सोयी-सुविधांचा अभाव असल्याने येथील नागरिकांना आजवर नागपूर (४०० कि.मी.) किंवा हैद्राबाद (२५० कि.मी.) पर्यंत उपचारासाठी जावे लागत होते. बाळंतपणापासून ते मोठ्या शस्त्रक्रियेसाठी या भागातील लोकांना प्रचंड त्रास सहन करावा लागत होता.

या पार्श्वभूमीवर पुण्यातील रुबी हॉस्पिटलच्या तोडीस तोड सुविधा असलेले 300 खाटांचे बहुप्रकारे सुसज्ज रुग्णालय सिरोंचात उभारले जाणार आहे.
या रुग्णालयात बाह्यरुग्ण विभाग, अस्थिरोग, स्त्रीरोग, कर्करोग, हृदयविकार, तसेच विविध शस्त्रक्रियांची उच्च दर्जाची व्यवस्था उपलब्ध होणार आहे.

राज्य व केंद्र सरकारच्या योजनांच्या माध्यमातून रुग्णांना मोफत किंवा अल्पदरात उपचार मिळतील. या रुग्णालयाचा फायदा केवळ सिरोंचालाच नव्हे तर छत्तीसगड व तेलंगणा सीमाभागातील हजारो नागरिकांनाही मिळणार आहे. या आरोग्य उपक्रमामुळे सीमाभागातील आरोग्य क्षेत्रात नवजीवन निर्माण होणार आहे.

––शिक्षण आणि रोजगाराच्या नव्या संधी

या मेडिकल हबसोबतच सिरोंचात एक अभियांत्रिकी, वैद्यकीय, दंत आणि नर्सिंग महाविद्यालय असलेले विशाल शैक्षणिक संकुल उभारण्यात येत आहे. या संकुलात व्यावसायिक अभ्यासक्रम, स्पर्धा परीक्षांसाठी मोफत मार्गदर्शन, आधुनिक लायब्ररी आणि विद्यार्थ्यांसाठी वस्तीगृहांची व्यवस्था राहणार आहे.

विशेष म्हणजे, आदिवासी विद्यार्थ्यांसाठी ७५ टक्के जागा राखीव ठेवण्यात येणार आहेत, ज्यामुळे सीमाभागातील तरुणाईला उच्च शिक्षणासाठी शहरांकडे धाव घेण्याची गरज उरणार नाही. शिक्षण आणि रोजगाराच्या या नवीन दालनामुळे सिरोंचा “ज्ञाननगरी” म्हणून ओळखला जाईल.-

-फडणवीस यांचा विकासाचा प्रवास – पुलापासून मेडिकल हबपर्यंत

सन 2016 मध्ये मुख्यमंत्री असताना देवेंद्र फडणवीस यांनी सिरोंचात येऊन गोदावरीवरील बहुप्रतीक्षित पुलाचे उद्घाटन केले होते. त्या पुलामुळे महाराष्ट्र, तेलंगणा आणि आंध्रप्रदेश या तिन्ही राज्यांतील दळणवळणाची नवी दारे खुली झाली.
त्या वेळी त्यांनी दिलेले वचन होते – “सिरोंचा हा सीमाभाग राहणार नाही, तो विकासाचा मार्ग दाखवणारा भाग बनेल.”

आज नऊ वर्षांनंतर, त्याच वचनाची पूर्तता होत आहे. सिरोंचा–हैद्राबाद बससेवा, वीजपुरवठा, पाणीपुरवठा आणि महामार्ग विकास यांसारख्या अनेक योजनांद्वारे त्यांनी सीमाभागात विकासाची पायाभरणी केली. आणि आता, मेडिकल व इंजिनिअरिंग हबच्या भूमिपूजनाने ते सिरोंचाच्या कायापालटाचा नवा अध्याय सुरू करणार आहेत.

–-महामार्ग विकासावर भर

दरम्यान, आलापल्ली–सिरोंचा राष्ट्रीय महामार्ग क्रमांक ३५३ या मार्गावरील दर्जाहीन कामाबाबत नागरिकांनी वारंवार तक्रारी केल्या आहेत. हा महामार्ग पूर्ण झाल्यास या मेडिकल हब, शैक्षणिक संस्था आणि औद्योगिक प्रकल्पांपर्यंत पोहोच अधिक सुलभ होईल. नागरिकांनी मुख्यमंत्र्यांकडे भ्रष्टाचारग्रस्त ठेकेदारांवर कारवाई आणि कामाचा दर्जा सुधारण्याची मागणी केली आहे.
मुख्यमंत्र्यांच्या या दौऱ्यात या विषयावर महत्त्वपूर्ण निर्णय घेतला जाण्याची शक्यता आहे.

—सिरोंचा सज्ज – उत्सवाचे स्वरूप धारण

मुख्यमंत्र्यांच्या आगमनानिमित्त सिरोंचा शहर सणाच्या वेशात सजले आहे. सार्वजनिक बांधकाम विभाग, महसूल व पोलीस यंत्रणा सतर्क असून उपविभागीय पोलिस अधिकारी संदेश नाईक यांच्या नेतृत्वाखाली सुरक्षा व्यवस्था काटेकोर करण्यात आली आहे.
शहरात रोषणाई, फुलांची सजावट आणि “जय विकास सिरोंचा!” या घोषणांनी वातावरण भारलेले आहे. नागरिक, व्यापारी, विद्यार्थी आणि शेतकरीवर्ग उत्साहाने या ऐतिहासिक क्षणाची वाट पाहत आहेत.

––सिरोंचाच्या भविष्यातील दिशा

मुख्यमंत्री देवेंद्र फडणवीस यांच्या नेतृत्वावरील जनतेचा विश्वास अद्याप तितकाच दृढ आहे. त्यांनी २०१६ मध्ये घातलेला विकासाचा पूल आता “भविष्याचा पूल” बनला आहे.
नागरिकांचे म्हणणे आहे — “फडणवीस साहेब जेव्हा जेव्हा सिरोंचात आले, तेव्हा इथे विकासाची नवी पहाट उगवली. आता ते सिरोंचाच्या कायापालटाचा आरंभ करूनच जातील.”

गोदावरीच्या काठावरून सुरू झालेला हा विकासाचा प्रवास आता शिक्षण आणि आरोग्याच्या दिशेने वळतो आहे. सिरोंचा आज सीमाभाग नसून, प्रगतीचा केंद्रबिंदू बनत आहे.
मुख्यमंत्री देवेंद्र फडणवीस यांचे हे आगमन केवळ एका भूमिपूजनाचा प्रसंग नसून, सिरोंचाच्या नव्या युगाची नांदी आहे — विकास, शिक्षण आणि आरोग्याच्या नव्या पर्वाची सुरुवात.

— विदर्भ न्यूज 24 — सीमाभागातील प्रत्येक बदलाचा साक्षीदार.