मुंबई विशेष प्रतिनिधी दिनांक:-22/02/2026
गडचिरोलीच्या भूमीवर नक्षलवाद्यांची कोणतीही निशाणी राहू दिली जाणार नाही, असा ठाम आणि स्पष्ट इशारा देवेंद्र फडणवीस यांनी दिला आहे. गडचिरोली जिल्ह्यात सी-६० कमांडो पथक, सीआरपीएफ आणि स्थानिक पोलिसांच्या संयुक्त कारवाईत तब्बल ४४ नक्षल स्मारके उद्ध्वस्त करण्यात आली असून, ही कारवाई नक्षलवादाच्या मुळावर घाव घालणारी असल्याचे मुख्यमंत्री फडणवीस यांनी म्हटले आहे.
या कारवाईबाबत मुख्यमंत्री फडणवीस यांनी आपल्या एक्स (माजी ट्विटर) पोस्टद्वारे माहिती देत जवानांच्या धाडसाचे आणि शौर्याचे मनापासून कौतुक केले. ही कारवाई केवळ काही बांधकामे पाडण्यापुरती मर्यादित नसून, नक्षलवादी दहशतवाद आणि हिंसाचाराला मुळासकट संपवण्याचा ठाम संदेश असल्याचे त्यांनी स्पष्ट केले. गडचिरोलीच्या पवित्र भूमीवर नक्षलवाद्यांची कोणतीही खूण, कोणतेही प्रतीक किंवा कोणतीही दहशत सहन केली जाणार नाही, असेही त्यांनी ठणकावून सांगितले.
कायदा व सुव्यवस्था अबाधित राखण्यासाठी, तसेच गडचिरोली जिल्ह्याला शांतता आणि विकासाच्या मार्गावर ठामपणे पुढे नेण्यासाठी राज्य व केंद्राच्या सुरक्षा यंत्रणा पूर्ण ताकदीने सज्ज असल्याचे मुख्यमंत्र्यांनी नमूद केले. सी-६०, सीआरपीएफ आणि पोलिसांच्या संयुक्त कारवायांमुळे नक्षलवाद्यांचे मनोबल खच्ची होत असून, त्यांच्या प्रचार आणि प्रतीकात्मक वर्चस्वालाही मोठा धक्का बसत असल्याचे स्पष्ट झाले आहे.
दरम्यान, केंद्रीय गृहमंत्रालयाने घेतलेल्या ताज्या आढाव्यानुसार देशातील नक्षलग्रस्त जिल्ह्यांची संख्या आता फक्त सातवर येऊन ठेपली आहे. विशेष म्हणजे या यादीत आता महाराष्ट्रातील एकाही जिल्ह्याचा समावेश नाही. गडचिरोली जिल्ह्याला नक्षलग्रस्त जिल्ह्यांच्या यादीतून वगळण्यात आल्याने हा महाराष्ट्रासाठी मोठा आणि ऐतिहासिक टप्पा मानला जात आहे.
सध्या नक्षलग्रस्त जिल्ह्यांमध्ये छत्तीसगडमधील बिजापूर, नारायणपूर, सुकमा, कांकेर आणि दंतेवाडा, झारखंडमधील पश्चिम सिंहभूम तसेच ओडिशातील कंधमाल या जिल्ह्यांचा समावेश आहे. केंद्र सरकारने या जिल्ह्यांचे तीन उपप्रकारांमध्ये वर्गीकरण केले असून, बिजापूर, नारायणपूर आणि सुकमा हे सर्वाधिक प्रभावित जिल्हे मानले जात आहेत. कांकेर आणि पश्चिम सिंहभूम हे संकटग्रस्त जिल्हे असून, दंतेवाडा आणि कंधमाल हे अन्य नक्षलग्रस्त जिल्हे म्हणून वर्गीकृत करण्यात आले आहेत.
केंद्र सरकारने नुकताच विविध राज्यांचा सविस्तर आढावा घेतला असून, मार्च २०२६ पर्यंत देशातून नक्षलवादाचा संपूर्ण नायनाट करण्याचे ठाम लक्ष्य निश्चित केले आहे. गडचिरोलीत नक्षल स्मारकांवर झालेली कारवाई ही त्या दिशेने टाकलेले अत्यंत महत्त्वाचे पाऊल मानले जात आहे.
दीर्घकाळ नक्षलवादाच्या सावटाखाली राहिलेल्या गडचिरोली जिल्ह्यासाठी ही कारवाई केवळ सुरक्षेपुरती मर्यादित नसून, विकास, विश्वास आणि स्थैर्याच्या नव्या पर्वाची नांदी ठरत आहे. नक्षलवाद्यांची दहशत, त्यांची प्रतीके आणि त्यांचा प्रभाव संपवून गडचिरोलीला पूर्णतः शांततेच्या आणि प्रगतीच्या मार्गावर नेण्याचा निर्धार आता प्रत्यक्ष कृतीत उतरल्याचे चित्र स्पष्ट होत आहे.
— विदर्भ न्यूज 24
About the Author
