महाबळेश्वर विदर्भ न्यूज 24 विशेष वृत्त दिनांक:-22/02/2026
राज्यातील औषध विक्रेते व वितरक सध्या ऑनलाइन विक्री, थेट पुरवठा, इन्शुरन्स क्लेम्समधील अडथळे आणि उद्योगातील असमतोल धोरणांमुळे मोठ्या आर्थिक व मानसिक तणावाला सामोरे जात आहेत. या पार्श्वभूमीवर Maharashtra State Chemists & Druggists Association (MSCDA) च्या उपकार्यकारिणी बैठकीला महाबळेश्वर येथे सुरुवात झाली असून, आज या बैठकीचे पहिले सत्र यशस्वीपणे संपन्न झाले.
महाबळेश्वर येथील एव्हरशाईन रिसॉर्टमध्ये पार पडलेल्या या सत्रात महाराष्ट्रातील विविध जिल्ह्यांमधून आलेले पदाधिकारी, जिल्हाध्यक्ष, सचिव तसेच कार्यकारिणी सदस्य मोठ्या संख्येने उपस्थित होते. केमिस्ट समाजाच्या भविष्यासाठी अत्यंत महत्त्वाच्या ठरणाऱ्या मुद्द्यांवर या सत्रात सखोल चर्चा करण्यात आली.
“केमिस्ट एकदा, केमिस्ट कायम” – ठाम भूमिका
पहिल्या सत्रात केमिस्ट उद्योजक सम्राट अप्पासाहेब शिंदे यांनी मार्गदर्शन करताना केमिस्ट समाजाची एकजूट आणि संघटनात्मक ताकद यावर भर दिला. उद्योग आणि धोरणकर्त्यांशी संवाद साधताना संघटित भूमिका किती आवश्यक आहे, हे त्यांनी ठळकपणे अधोरेखित केले. केमिस्ट हा केवळ व्यापारी नसून समाजाच्या आरोग्य व्यवस्थेचा महत्त्वाचा आधारस्तंभ आहे, असे त्यांनी नमूद केले.
याच सत्रात MSCDA चे महाराष्ट्र राज्याचे मानद महासचिव अनिल नावंदर यांनी सविस्तर मार्गदर्शन करत, सध्याच्या काळात केमिस्टसमोरील आव्हाने स्पष्ट केली. ऑनलाइन विक्रीमुळे पारंपरिक औषध दुकानांवर होणारा परिणाम, थेट पुरवठ्यामुळे वितरक व किरकोळ केमिस्टचे होणारे नुकसान, तसेच विविध स्कीम्समधील असमानता या मुद्द्यांवर त्यांनी परखड भूमिका मांडली.
प्रत्येक केमिस्टसाठी लाइफ इन्शुरन्स – दिलासा देणारा निर्णय
या पहिल्या सत्रातील सर्वात महत्त्वाचा आणि दिलासा देणारा निर्णय म्हणजे प्रत्येक केमिस्टला लाइफ इन्शुरन्सच्या कक्षेत आणण्याचा प्रस्ताव. केमिस्ट आपल्या दुकानात दिवसरात्र सेवा देत असतो; मात्र त्याच्या व कुटुंबाच्या सुरक्षिततेसाठी ठोस उपाययोजना नसतात. ही उणीव भरून काढण्यासाठी MSCDA च्या माध्यमातून केमिस्टसाठी लाइफ इन्शुरन्स उपलब्ध करून देण्याचा निर्णय घेण्यात येत असल्याची माहिती यावेळी देण्यात आली. या घोषणेला उपस्थित केमिस्टांकडून सकारात्मक प्रतिसाद मिळाला.
संघटना केमिस्टच्या पाठीशी ठाम
“केमिस्टच्या हितासाठी संघटना नेहमीच लढत राहील आणि कोणत्याही अन्यायकारक धोरणाला विरोध करेल,” असा ठाम विश्वास यावेळी व्यक्त करण्यात आला. केमिस्ट एकदा आणि केमिस्टच्या हितासाठीच संघटना काम करेल, हा संदेश या सत्रातून स्पष्टपणे देण्यात आला.
दुसऱ्या सत्राकडे सर्वांचे लक्ष
उद्या होणाऱ्या दुसऱ्या सत्रात इन्शुरन्स क्लेम्समधील तांत्रिक अडचणी, ऑनलाइन प्लॅटफॉर्मना थेट औषध पुरवठा, औषधांची ऑनलाइन विक्री, तसेच MSCDA च्या घटनेतील संभाव्य बदल यावर सविस्तर आणि निर्णायक चर्चा होणार आहे. या बैठकीतून केमिस्ट समाजाच्या भविष्यासाठी ठोस निर्णय घेतले जातील, अशी अपेक्षा व्यक्त केली जात आहे.
About the Author
