अहेरी विदर्भ न्यूज 24 प्रतिनिधी दिनांक: 22 एप्रिल 2026
गेल्या अनेक वर्षांपासून रखडलेल्या राष्ट्रीय महामार्ग क्रमांक ३५३ C च्या अर्धवट कामामुळे अहेरी तालुक्यातील नागरिकांचा संयम आता पूर्णपणे सुटला आहे. रस्त्याची दयनीय अवस्था, वाढत्या अपघातांच्या घटना आणि उडणाऱ्या धुळीमुळे नागरिकांचे दैनंदिन जीवन अक्षरशः धोक्यात आले आहे. प्रशासन आणि संबंधित कंत्राटदार यांच्या उदासीनतेविरोधात आता जनआक्रोश उफाळून आला असून, परिस्थिती आंदोलनाच्या टप्प्यावर पोहोचली आहे.
याच पार्श्वभूमीवर भ्रष्टाचार निवारण समितीचे गडचिरोली जिल्हाध्यक्ष संतोष रामचंद्र ताटीकोंडावार यांनी येत्या २९ एप्रिल २०२६ रोजी मौजा मोसम येथील संड्रा फाटा येथे तीव्र ‘रस्ता रोको’ आंदोलन करण्याचा इशारा दिला आहे. प्रशासन, राष्ट्रीय महामार्ग विभाग आणि संबंधित कंत्राटदारांविरोधात संतप्त भावना व्यक्त करत नागरिकांनी आता थेट आंदोलनाचा मार्ग स्वीकारण्याचा निर्धार केला आहे.
सन २०२१ मध्ये या महामार्गाच्या बांधकामाचे कंत्राट वैशिष्ट्य कंपनी, व्ही. एम. म्हात्रे कंपनी आणि ए. सी. शेख कंपनी यांना देण्यात आले होते. मात्र, तब्बल सहा वर्षांचा कालावधी उलटूनही केवळ १६ किलोमीटर रस्त्याचे काम पूर्ण झाल्याचे समोर आले आहे. उर्वरित रस्ता अद्याप अर्धवट अवस्थेत असून, यामुळे या मार्गावरून प्रवास करणाऱ्या नागरिकांना दररोज मोठ्या अडचणींना सामोरे जावे लागत आहे. या विलंबासाठी संबंधित कंत्राटदारांवर कठोर कारवाई करत कंत्राट तात्काळ रद्द करावे, कंपन्यांना काळ्या यादीत टाकावे आणि त्यांच्याकडून पाचपट दंड वसूल करावा, अशी ठाम मागणी करण्यात आली आहे.
सध्या या महामार्गाच्या अनेक भागांमध्ये कंत्राटदाराने केवळ गिट्टी टाकून काम अर्धवट सोडल्याचे वास्तव समोर येत आहे. गेल्या चार महिन्यांपासून जवळपास आठ ते दहा किलोमीटर अंतरावर गिट्टीचा थर कायम असल्याने हा मार्ग अत्यंत धोकादायक बनला आहे. विशेषतः दुचाकीस्वारांना वाहनावर नियंत्रण ठेवणे कठीण होत असून, घसरून अपघात होण्याच्या घटना सातत्याने घडत आहेत. स्थानिकांच्या मते, हा रस्ता आता प्रवाशांसाठी अक्षरशः ‘मृत्यूचा सापळा’ ठरला आहे.
रस्त्यावरील अपूर्ण कामामुळे मोठ्या प्रमाणात पांढरी धूळ उडत असून, त्याचा परिणाम स्थानिक नागरिकांच्या आरोग्यावर होत आहे. लहान मुले, ज्येष्ठ नागरिक आणि रस्त्यालगत राहणाऱ्या कुटुंबांना श्वसनाचे विकार, सतत खोकला, डोळ्यांची जळजळ अशा समस्या जाणवत आहेत. अनेक वेळा प्रशासनाकडे तक्रारी करूनही कोणतीही ठोस कार्यवाही न झाल्याने नागरिकांचा संताप अधिक तीव्र झाला आहे.
या प्रकरणातील आणखी एक गंभीर बाब म्हणजे सन २०२५ मध्ये तहसील कार्यालयात झालेल्या बैठकीत संबंधित अधिकाऱ्यांनी आणि कंत्राटदाराने काम तातडीने पूर्ण करण्याचे आश्वासन दिले होते. मात्र, एक वर्ष उलटूनही परिस्थितीत कोणताही बदल झालेला नाही. यामुळे प्रशासन संबंधित कंत्राटदाराला अप्रत्यक्षपणे पाठीशी घालत आहे का, असा थेट सवाल संतोष ताटीकोंडावार यांनी उपस्थित केला आहे. नागरिकांमध्येही याबाबत संशयाचे वातावरण निर्माण झाले आहे.
दरम्यान, येत्या काही आठवड्यांत पावसाळा सुरू होणार असल्याने परिस्थिती आणखी गंभीर होण्याची भीती व्यक्त केली जात आहे. अपूर्ण रस्ता पावसात चिखलमय झाल्यास वाहतूक पूर्णपणे ठप्प होऊ शकते. ग्रामीण भागातील रुग्णवाहिका, शालेय वाहने आणि दैनंदिन प्रवास करणाऱ्या नागरिकांसाठी हा मार्ग अत्यंत महत्त्वाचा असल्याने त्याचा मोठा फटका बसण्याची शक्यता आहे.
२९ एप्रिल रोजी होणाऱ्या ‘रस्ता रोको’ आंदोलनानंतरही प्रशासनाने योग्य दखल घेतली नाही, तर मुंबई उच्च न्यायालयाच्या नागपूर खंडपीठात जनहित याचिका दाखल करण्याचा स्पष्ट इशारा देण्यात आला आहे. या निवेदनाच्या प्रती गडचिरोलीचे पालकमंत्री आशिष जैस्वाल, आमदार धर्मरावबाबा आत्राम तसेच संबंधित वरिष्ठ पोलीस आणि महामार्ग विभागाच्या अधिकाऱ्यांना माहिती व पुढील कार्यवाहीसाठी पाठवण्यात आल्या आहेत.
निवेदन सादर करताना रियाज शेख (जिल्हाध्यक्ष, राष्ट्रवादी काँग्रेस पक्ष, गडचिरोली), सालया कम्मलवार (ग्रामपंचायत सदस्य), धराजी गेडाम, मधुकर चिमणकर, महेश तुंमरम तसेच व्यंकटरावपेठा येथील ग्रामपंचायत सदस्य उपस्थित होते.
NH 353 C हा केवळ एक रस्ता नसून अनेक गावांच्या जीवनवाहिनीचा आधार आहे. मात्र, या रस्त्याची सध्याची अवस्था पाहता प्रशासनाच्या निष्क्रियतेचा फटका थेट सामान्य नागरिकांना बसत आहे. आता नागरिकांनी स्पष्ट इशारा दिला आहे — प्रश्न सुटला नाही तर आंदोलन अधिक तीव्र होईल
#NH353C #अहेरी #गडचिरोली #रस्तारोको #विदर्भन्यूज24 #महामार्ग #जनआक्रोश #ब्रेकिंगन्यूज #RoadSafety
About the Author
