सिरोंचा विशेष प्रतिनिधी दिनांक . 31 ऑगस्ट 2026
राखीचा धागा हा केवळ भाऊ-बहिणीच्या नात्याचे प्रतीक नाही, तर तो विश्वास, आपुलकी आणि संरक्षणाची भावना जोडणारा धागा आहे. याच भावनेचा सुंदर प्रत्यय सिरोंचा पोलीस ठाण्यात सोमवारी पाहायला मिळाला. शाळेतील विद्यार्थीनींनी पोलिस अधिकारी व अंमलदारांना राखी बांधत रक्षाबंधन साजरे केले आणि पोलीस बांधवांनीही त्यांच्या सुरक्षिततेची जबाबदारी सदैव पार पाडण्याचा विश्वास दिला. या भावनिक वातावरणामुळे पोलीस ठाण्यात काही काळ कर्तव्याच्या कठोर वातावरणाऐवजी भाऊ-बहिणीच्या प्रेमाची ऊब अनुभवायला मिळाली.
दि. 31 ऑगस्ट रोजी सकाळी 10 ते दुपारी 12.30 वाजेपर्यंत पोलीस स्टेशन सिरोंचा येथे रक्षाबंधन कार्यक्रम उत्साहात पार पडला. कार्यक्रमास उपविभागीय पोलीस अधिकारी समाधान पाटील, पोलीस निरीक्षक बाबासाहेब दुधाळ, जिल्हा पोलीस अधिकारी व अंमलदार, एस.आर.पी.एफ.चे अधिकारी व अंमलदार, पोलीस बॉईज संघटनेचे तालुकाध्यक्ष विशाल मादेशी, तसेच जिल्हा परिषद शाळा सिरोंचा व भगवंतराव विद्यालयातील शिक्षक आणि विद्यार्थीनी उपस्थित होत्या.
यावेळी विद्यार्थीनींनी पोलीस अधिकारी व जवानांना राखी बांधून औक्षण केले. राखी बांधताना त्यांच्या चेहऱ्यावर दिसणारा आनंद आणि पोलिसांच्या चेहऱ्यावर उमटलेले समाधान हे या कार्यक्रमाचे खास आकर्षण ठरले. समाजाच्या सुरक्षेसाठी दिवस-रात्र कर्तव्य बजावणाऱ्या पोलिसांना बहिणीच्या प्रेमाची ही छोटीशी भेट जणू त्यांच्या कर्तव्याला नवी ऊर्जा देणारी ठरली.
‘तुम्ही आमच्या बहिणी आहात आणि तुमच्या सुरक्षेसाठी पोलीस सदैव तुमच्या पाठीशी आहेत,’ हा विश्वास या कार्यक्रमातून देण्यात आला. महिला आणि मुलींनी कोणत्याही प्रकारची भीती न बाळगता अडचणीच्या प्रसंगी पोलिसांशी संपर्क साधावा, असे आवाहनही यावेळी करण्यात आले.
कार्यक्रमाला पोलीस स्टेशन सिरोंचा येथील ३ अधिकारी, ३८ महिला व पुरुष अंमलदार, एस.आर.पी.एफ.चे १ अधिकारी व १५ अंमलदार, १० होमगार्ड, शिक्षक तसेच सुमारे ५० विद्यार्थीनी उपस्थित होत्या.
यावेळी विद्यार्थीनींना ओवाळणीचे गिफ्ट म्हणून पेन, रजिस्टर व मिठाईचे वाटप करण्यात आले. उपस्थितांसाठी अल्पोपहाराचीही व्यवस्था करण्यात आली.
रक्षाबंधनाच्या या उपक्रमाने पोलीस ठाणे आणि नागरिक यांच्यातील पारंपरिक ‘कायदा आणि पोलीस’ या नात्यापलीकडे जाऊन विश्वास, आपुलकी आणि माणुसकीचे नाते निर्माण करण्याचा प्रयत्न केला. बंदुकीऐवजी हातात राखी आणि कर्तव्याच्या कठोर चेहऱ्यावर बहिणीच्या प्रेमाचे हास्य—अशा वेगळ्या वातावरणात सिरोंचा पोलीस ठाण्यातील रक्षाबंधनाचा हा सोहळा अनेकांच्या मनात कायमचा ठसा उमटवून गेला.
राखीचा हा छोटासा धागा पोलिसांच्या मनगटावर बांधला गेला; मात्र त्यातून महिला व मुलींच्या सुरक्षिततेचा विश्वास अधिक मजबूत झाला, हेच या रक्षाबंधनाचे खरे सार ठरले.
About the Author
