सिरोंचा विशेष प्रतिनिधी दिनांक:- 14 एप्रिल 2026
वनवैभव शिक्षण मंडळ, अहेरी द्वारा संचलित भगवंतराव कला व विज्ञान उच्च माध्यमिक विद्यालय, सिरोंचा येथे आज शिक्षण विभागाच्या वरिष्ठ अधिकाऱ्यांनी आकस्मिक भेट देत शाळेच्या शैक्षणिक व प्रशासकीय कामकाजाचा सखोल आढावा घेतला. या भेटीमुळे शाळेच्या शैक्षणिक वातावरणात नवचैतन्य निर्माण झाल्याचे चित्र पाहायला मिळाले.
नागपूर विभागाच्या शिक्षण उपसंचालक मा. डॉ. माधुरी सावरकर यांनी या भेटीदरम्यान शाळेतील विविध शैक्षणिक उपक्रम, अध्यापन पद्धती, विद्यार्थ्यांची उपस्थिती, गुणवत्ता तसेच एकूण शैक्षणिक प्रगती यांचे बारकाईने निरीक्षण केले. शाळेत आगमन होताच वनवैभव शिक्षण मंडळाच्या वतीने त्यांचे पारंपरिक पद्धतीने पुष्पगुच्छ देऊन स्वागत करण्यात आले.
यानंतर डॉ. सावरकर यांनी शाळेतील विविध विभागांना भेट देत वर्गखोल्यांमध्ये प्रत्यक्ष जाऊन विद्यार्थ्यांशी संवाद साधला. विद्यार्थ्यांच्या शैक्षणिक प्रगतीची माहिती घेतली तसेच शिक्षकांशी चर्चा करून अध्यापन पद्धती, शैक्षणिक नियोजन आणि गुणवत्ता वृद्धीसाठी राबविण्यात येणाऱ्या उपक्रमांचा आढावा घेतला.
भेटीदरम्यान प्रयोगशाळा, वाचनालय, स्वच्छता व्यवस्था तसेच इतर शैक्षणिक सुविधांची पाहणी करण्यात आली. विद्यार्थ्यांची शिस्त, नियमित उपस्थिती आणि शाळेतील एकूण शैक्षणिक वातावरणाबाबत समाधान व्यक्त करत त्यांनी शिक्षकांच्या कार्यतत्परतेचे कौतुक केले. विद्यार्थ्यांच्या प्रगतीबाबतही त्यांनी समाधान व्यक्त करत पुढील वाटचालीसाठी सकारात्मक मार्गदर्शन केले.
या प्रसंगी प्रा. सरफराज आलम, प्राचार्य शाहिद शेख, प्राचार्य पारवेझ शेख, प्रा. तिरुमल सर यांसह इतर मान्यवर उपस्थित होते. सर्वांनी पाहुण्यांचे स्वागत करून कार्यक्रम यशस्वी करण्यासाठी मोलाची भूमिका बजावली.
भेटीदरम्यान शिक्षण उपसंचालकांनी शाळेच्या एकूण कार्याचा गौरव करत काही आवश्यक सुधारणा सुचविल्या. शैक्षणिक गुणवत्ता अधिक वृद्धिंगत करण्यासाठी त्यांनी मार्गदर्शन केले. ही आकस्मिक भेट शाळेसाठी प्रेरणादायी ठरली असून भविष्यातील प्रगतीसाठी दिशा देणारी असल्याचे मत यावेळी व्यक्त करण्यात आले.
— विदर्भ न्यूज 24
About the Author
